Milicyja: Vykradańnia Femen nie było

Jelski RAUS admoviŭ u raspačynańni kryminalnaj spravy pa fakcie incydentu z aktyvistkami ŭkrainskaha ruchu Femen.

Jelski RAUS 18 studzienia pryniaŭ pastanovu ab admovie ŭ raspačynańni kryminalnaj spravy pa fakcie incydentu z aktyvistkami ŭkrainskaha ruchu Femen.

Jak paviedamili ŭ pres-słužbie UUS Homielskaha abłvykankama, padčas praviedzienaj pravierki milicyja nie zdabyła materyjałaŭ abo dokazaŭ infarmacyi, jakaja źjaviłasia ŭ internecie, ab vykradańni i źbivańni ŭkrainak.

«U internecie źjaviłasia infarmacyja, što 20 śniežnia ŭ Minsku byli vykradzieny hramadzianki Ukrainy, jakija potym byli dastaŭleny ŭ viosku Bieki Jelskaha rajona. Na miesca vyjechała śledča-apieratyŭnaja hrupa, dziaŭčaty sapraŭdy byli ŭ vioscy, ich dastavili ŭ RAUS. Jany dali tłumačeńni, anałahičnyja infarmacyi ŭ internecie — što ich vykrali, pahražali ich žyćciu, ździekavalisia. Ale zajavu ab hetym dziaŭčaty nie pisali, pravierka pravodziłasia pa fakcie», — prakamientavaŭ načalnik adździeła infarmacyi i hramadskich suviaziej UUS Andrej Maziepin.

Pavodle jaho słoŭ, padčas pravierki milicyja nakiravała šerah zapytaŭ, na jakija atrymany adkazy, apytała mahčymych śviedak złačynstva, była praviedziena ekśpiertyza dziaŭčat — ale cialesnych paškodžańniaŭ u ich nie było vyjaŭlena.

«Materyjałaŭ z paćviardžeńniem słoŭ ukrainak zdabyta nie było, u raspačynańni kryminalnaj spravy admoŭlena, bo niama składu złačynstva»,

***

Aktyvistki Femen Ina Šaŭčenka, Aksana Šačko i Alaksandra Niamčynava byli zatrymany milicyjaj u pahraničnaj zonie ŭ vioscy Bieki Jelskaha rajona 20 śniežnia. Jany paviedamili, što byli zatrymany viečaram 19 śniežnia na Uschodnim aŭtavakzale ŭ Minsku. Ich zatrymlivali šeść mužčyn, jakija nie nazvalisia, ale adrazu ž nasunuli šapki na vočy aktyvistkam i pavieźli ich u nieviadomym napramku.

Pavodle słoŭ dziaŭčyn, ich vyvieźli ŭ les, dzie pahražali i ŭsialak ździekavalisia, prymušali raspranacca dahała, ablili hałovy zialonkaj, prymušali trymać płakaty z fašysckaj svastykaj. Usio heta zdymałasia na videakamieru.

U aktyvistak Femen pry zatrymańni zabrali mabilnyja telefony i dakumienty. U vyniku jany apynulisia za paŭtara kiłamietra ad ukrainskaj miažy, vyjšli da vioski Bieki, dzie źviarnulisia da miascovych žycharoŭ. Potym pryjechała milicyja i zabrała ich u rajadździeł.

Milicyjaniery rastłumačyli, što dziaŭčyny byli znojdzieny ŭ pahraničnaj zonie kala vioski Bieki. U ich nie było dakumientaŭ, tamu jany byli dastaŭleny ŭ adździeł milicyi dla razboru. Tudy ž prybyŭ konsuł Ukrainy, jaki potym pieravioz ich cieraz biełaruska-ŭkrainskuju miažu i dastaviŭ u Kijeŭ.

19 śniežnia ŭ Minsku Ina Šaŭčenka, Aksana Šačko i Alaksandra Niamčynava, ahaliŭšysia pa pojas pierad uvachodam u budynak KDB, na praciahu niekalkich chvilin trymali płakaty z nadpisami Freedom to political prisoners («Svabodu palityčnym źniavolenym») i «Žyvie Biełaruś!». Druhi łozunh jany skandavali. Akcyja była prymierkavana na hadaviny razhonu ŭ Minsku apazicyjnaj demanstracyi 19 śniežnia 2010 hoda, udzielniki jakoj byli nie zhodnyja z aficyjnymi vynikami prezidenckich vybaraŭ.

Kamientary da artykuła