ES pa-raniejšamu razhladaje pytańnie ab pašyreńni śpisa nieŭjaznych biełaruskich čynoŭnikaŭ
Jeŭrasajuz razhladaje pytańnie ab dabaŭleńni novych imion u śpis biełaruskich čynoŭnikaŭ, jakim zabaronieny ŭjezd na terytoryju ES. Pra heta BiełaPAN paviedamiła Maja Kačyjančyč,pres-sakratar viarchoŭnaha pradstaŭnika ES pa zamiežnych spravach i palitycy biaśpieki Ketryn Eštan, kamientujučy inicyjatyvu «Ofisa za demakratyčnuju Biełaruś» (Brusiel) pierahledzieć hety śpis.
«Miač na baku biełaruskich uład. Jany pavinny vyzvalić i reabilitavać usich palityčnych źniavolenych, i tady ES zmoža reahavać adpaviedna», — padkreśliła Kačyjančyč.
Nahadajem, u siońniašniaj zajavie «Ofisa za demakratyčnuju Biełaruś» skazana: «Pakolki vidavočna, što Jeŭrapiejski sajuz nie stanie źviartacca da realnych ekanamičnych sankcyj dla akazańnia nacisku na biełaruskija ŭłady, šerah biełaruskich arhanizacyj i palitykaŭ prytrymlivajucca mierkavańnia, što pierahlad hetak zvanaha čornaha śpisa na ŭjezd u ES dazvolić paskoryć praces vyzvaleńnia palitźniavolenych u Biełarusi».
Jak vynikaje z kamientaryjaŭ kiraŭnika ofisa Volhi Stužynskaj, sa śpisa prapanujecca vyklučyć rektaraŭ dziaržaŭnych VNU, što pavinna spryjać refarmavańniu sistemy biełaruskaj vyšejšaj adukacyi. Prapanujecca taksama vyklučyć ź pieraliku proźvišča biźniesmiena Uładzimira Piefcijeva, bo, pavodle słoŭ Stužynskaj, pad kryteryi, na padstavie jakich jon uklučany ŭ śpis, traplajuć praktyčna ŭsie dziaržpradpryjemstvy i luby bujny biźnies u Biełarusi, jakich taksama možna nazvać sponsarami režymu. Akramia taho, adznačyŭ kiraŭnik ofisa, u śpisie nieŭjaznych «jość ludzi, jakija znachodziacca tam piać hadoŭ, jakija pamierli ci ŭžo daŭno nie zajmajuć svaich pasad» — naprykład były kiraŭnik Biełteleradyjokampanii Alaksandr Zimoŭski, što apošni hod pracuje ŭ Rasii.
«Proźviščy tych, kaho možna vynieści ź vizavaha śpisa, uzhodnieny padčas kansultacyj pradstaŭnikoŭ biełaruskaj i mižnarodnaj hramadzianskaj supolnaści, čyje imiony nie mohuć być nazvany bieź ich papiaredniaj zhody», — havorycca ŭ zajavie «Ofisa za demakratyčnuju Biełaruś».