Milinkievič: Biełaruś płyvie ŭ pastku inkarparacyi
«Režym udaryŭ nie pa Jeŭrasajuzie, a pa sabie i pa biełarusach, jon zahaniaje krainu ŭ jašče bolšuju samaizalacyju ad cyvilizavanaha śvietu», — takim čynam lidar Ruchu «Za Svabodu» Alaksandr Milinkievič prakamientavaŭ reakcyju biełaruskich uładaŭ na pašyreńnie śpisu nieŭjaznych biełaruskich čynoŭnikaŭ, u pryvatnaści pažadańnie, kab kiraŭnik Pradstaŭnictva ES u Biełarusi i pasoł Polščy pakinuli našu krainu. U svaju čarhu krainy Jeŭrasajuza pryniali rašeńnie pra adklikańnie ź Minska svaich pasłoŭ.
«Pazicyja abjadnanaj Jeŭropy absalutna słušnaja: jana nie choča bačyć u siabie doma tych, chto sadzić u turmy inšadumcaŭ. Heta jaje prava, kaho zaprašać u hości. „Nie, my ŭsio roŭna chočam na vaša viasielle!“, — kažuć pryŭładnyja parušalniki Kanstytucyi i zabirajuć u biełarusaŭ i ichnich dziaciej prava na prystojnuju budučyniu», — skazaŭ Milinkievič.
Na jahonuju dumku, pamiž Biełastokam i Hrodna ciapier — amal Bierlinski mur: «Jeŭraźviaz paśla tak zvanych vybaraŭ prezidenta 19 śniežnia 2010 hoda praktyčna nie maje instrumientaŭ upłyvu na pavodziny i ŭnutranuju palityku ŭładaŭ Biełarusi».
Lidar Ruchu «Za Svabodu» kaža, što, «kali b taki samy mur byŭ pamiž Oršaj i Smalenskam, to jeŭraźviazaŭskija sankcyi, moža, dziejničali b efiektyŭna, davali b šaniec na demakratyzacyju Biełarusi. Ale pakolki jość taki abaronca, jak Rasija, to ščyra skažam: hetyja sankcyi nie pryvodziać da vyzvaleńnia palitviaźniaŭ i demakratyzacyi».
Alaksandr Milinkievič zaznačaje, što, biasprečna, sankcyi ES maralnyja, ale ŭ palitycy hetaha niedastatkova: «Akramia maralnaj pazicyi musić być efiektyŭnaść. Stavim metu i aceńvajem dziejańni pa vynikovaści. A jana, pa vialikamu rachunku, admoŭnaja: niemadernizavanaja Biełaruś sa svajoj dyktaturaj płyvie ŭ pastku inkarparacyi z boku ŭschodniaha susieda. Maskva vyjhraje».
«Tolki kankretyzavanaja jeŭrapiejskaja pierśpiektyva, paśladoŭnaja praca pa nacyjanalnym adradžeńni i jeŭrapieizacyi Biełarusi, źniščeńnie barjeraŭ na Zachadzie, jeŭrapiejskaj dapamoha ŭ madernizacyi ekanomiki i palityki pakidajuć šaniec na zachavańnie biełaruskaj dziaržavy i raźvićcio biełaruskaj nacyi», — ličyć lidar Ruchu «Za Svabodu».
Nahadajem, 28 lutaha aficyjny Minsk prapanavaŭ kiraŭniku Pradstaŭnictva ES u Biełarusi i pasłu Polščy «vyjechać u svaje stalicy dla kansultacyj, kab davieści svajmu kiraŭnictvu ćviorduju pazicyju biełaruskaha boku ab nieprymalnaści nacisku i sankcyj». Pra heta zajaviŭ
Krainy ES u adkaz adklikajuć svaich pasłoŭ ź Biełarusi dla kansultacyj.
27 lutaha na pasiadžeńni Savieta ministraŭ zamiežnych spraŭ krain ES u Brusieli ŭ tak zvany čorny śpis byŭ uklučany jašče 21 biełaruski čynoŭnik. Heta pradstaŭniki sudovaj sistemy i pravaachoŭnych orhanaŭ.
Pieršapačatkova ŭ śpisie było 158 imionaŭ. Paśla Saviet ES nieadnarazova pašyraŭ hety pieralik, i ciapier ujezd u Jeŭrasajuz zabaronieny bolš čym 200 biełaruskim čynoŭnikam.
U sakaviku Saviet ministraŭ ES razhledzić poŭny śpis biełaruskich pradpryjemstvaŭ i biźniesmienaŭ, da jakich mohuć być prymienienyja sankcyi ES, paviedamiła Ketryn Eštan.