Dziarždoŭh Biełarusi vyras u paraŭnańni z pačatkam 2011 hoda ŭ 2,8 razu
Dziaržaŭny doŭh Respubliki Biełaruś na 1 lutaha 2012 hoda skłaŭ 116,6 trłn. rubloŭ i pavialičyŭsia ŭ paraŭnańni z pačatkam hoda na 0,2 trłn. rubloŭ, ci na 0,2%. U paraŭnańni z pačatkam 2011 hoda dziaržaŭny doŭh vyras na 85,9 trłn. rubloŭ, ci na 281,3%.
Jak paviedamlaje Ministerstva finansaŭ, rost doŭhu (u biełaruskich rublach) u pieršuju čarhu abumoŭleny pieraacenkaj źniešniaha dziaržaŭnaha doŭhu z pryčyny devalvacyi nacyjanalnaj valuty ŭ mai i kastryčniku 2011 hoda.
Źniešni dziaržaŭny doŭh pa stanie na 1 lutaha 2012 hoda skłaŭ 11,8 młrd. dołaraŭ pry ŭstanoŭlenym limicie 14,3 młrd. dołaraŭ ZŠA, pavialičyŭšysia z pačatku hoda na 24 młn. dołaraŭ. Za 2011 hod źniešni dziaržaŭny doŭh vyras na 2,3 młrd. dołaraŭ ZŠA, ci na 24,4%.
Pa dadzienych Minfina, rost źniešniaha dziarždoŭhu ŭ 2011 hodzie zabiaśpiečany pryciahnieńniem niaźviazanych kredytnych resursaŭ dla papaŭnieńnia zołatavalutnych reziervaŭ: ablihacyi na mižnarodnym finansavym rynku (800 młn. dołaraŭ); kredyt Antykryzisnaha fondu JeŭrAzES (1 młrd. 240 młn. dołaraŭ).
Akramia taho, źniešni dziarždoŭh vyras u suviazi ź finansavańniem za košt źniešnich dziaržaŭnych pazyk (Kitaj, MBRR) inviestycyjnych prajektaŭ u śfiery enierhietyki, pramysłovaści budaŭničych materyjałaŭ, sacyjalnaj śfiery.
Unutrany dziarždoŭh z pačatku 2012 hoda nie źmianiŭsia, pa stanie na 1 lutaha 2012 hoda jon skłaŭ 17,9 trłn. rubloŭ pry ŭstanoŭlenym limicie 18,7 trłn. rubloŭ. U paraŭnańni z pačatkam 2011 hoda ŭnutrany dziarždoŭh vyras na 15,8 trłn. rubloŭ, ci na 765,2%.
Rost unutranaha dziaržaŭnaha doŭhu ŭ 2011 hodzie abumoŭleny vypuskam dziaržablihacyj u metach realizacyi ŭkaza prezidenta ad 22 lutaha 2011 hoda № 65 «Ab niekatorych pytańniach finansavańnia budaŭnictva abjektaŭ inžyniernaj i transpartnaj infrastruktury dla rajonaŭ žyłoj zabudovy i abjektaŭ infrastruktury atamnaj elektrastancyi ŭ Respublicy Biełaruś»; raźmiaščeńniem dziaržablihacyj, naminavanych u zamiežnaj valucie, z metaj papaŭnieńnia zołatavalutnych reziervaŭ.