U Źmitra Bandarenki pahoršyŭsia stan zdaroŭja

U Źmitra Bandarenki, kaardynatara kampanii «Jeŭrapiejskaja Biełaruś», davieranaj asoby kandydata ŭ prezidenty Andreja Sańnikava, u mahiloŭskaj kałonii № 15 pahoršyŭsia stan zdaroŭja, paviedamiła jaho žonka Volha Bandarenka.

Pavodle jaje słoŭ, Źmicier prysłaŭ list, dzie piša, što ŭ kałonii byŭ vialiki ahlad. «Źniavolenyja doŭha stajali, Źmicier prastudziŭsia. U jaho była vysokaja tempieratura, jon pajšoŭ u sančastku, jamu dali leki. Jon paprasiŭ palažać u sančastcy — usio-taki, u jaho chvory chrybiet, i jon chodzić z kijkom. Spačatku jamu admovili sa słovami: „Idzicie, Bandarenka, nie handlujciesia“. Ale potym usio-taki pamiaścili ŭ sančastku», — raskazała Volha Bandarenka.

U piatnicu, 2 sakavika, u kałonii pavinna adbycca pasiadžeńnie kamisii pa invalidnaści. «Uličvajučy toje, što ŭ kamisiju ŭvachodziać pradstaŭniki KDB, MUS, Ministerstva abarony, ja nie dumaju, što hetaja kamisija daść Źmitru hrupu invalidnaści», — adznačyła žonka źniavolenaha.

Nahadajem, Źmicier Bandarenka asudžany na dva hady pazbaŭleńnia voli ŭ kałonii ahulnaha režymu. Adrazu paśla aryštu ŭ śniežni 2010 hoda ŭ jaho abvastrylisia chraničnyja zachvorvańni, u lipieni jamu zrabili apieracyju na pazvanočniku ŭ 5-j kliničnaj balnicy Minska. U kancy studzienia hetaha hoda Bandarenku zrabili bolš žorstkimi ŭmovy ŭtrymańnia ŭ kałonii, niahledziačy na ciažki stan zdaroŭja. Asudžanamu, u pryvatnaści, zabaranili karystacca kastylom, na jaki jon abapiraŭsia pry chadźbie, nasić miakki abutak, jaki jamu pieradała žonka, abaviazali vychodzić na pracu, na pavierku na plac, chadzić u strai.

Bandarenka 1 lutaha padaŭ prašeńnie ab pamiłavańni na imia Alaksandra Łukašenki. Paśla hetaha jamu dazvolili karystacca kastylom.

Kamientary da artykuła