Źmitru Bandarenku nie prysvoili hrupu invalidnaści

Kaardynataru kampanii «Jeŭrapiejskaja Biełaruś», davieranaj asobie kandydata ŭ prezidenty Andreja Sańnikava na vybarach-2010 Źmitru Bandarenku, jaki adbyvaje pakarańnie ŭ mahiloŭskaj kałonii № 15, nie prysvoili hrupu invalidnaści. Takoje rašeńnie pryniała mižviedamasnaja navukova-ekśpiertnaja kamisija 2 sakavika na pasiadžeńni, jakoje prajšło ŭ Respublikanskim navukova-praktyčnym centry miedycynskaj ekśpiertyzy i reabilitacyi ŭ Haradziščy (Minski rajon), paviedamiła žonka Bandarenki Volha.

Pry hetym u kamisii žoncy Bandarenki paviedamili, što jaje členy «praviali vialikuju rabotu, abtelefanavali pa pracoŭnaj knižcy ŭsie byłyja miescy pracy i vučoby, dumajučy ŭ tym liku i pra jaho pracaŭładkavańnie paśla vyzvaleńnia». «Ciapier Źmitru nie budzie nijakich paturańniaŭ, niahledziačy na stan zdaroŭja. Jaho prymusiać pracavać», — ličyć Volha Bandarenka.

Nahadajem, Źmicier Bandarenka asudžany na dva hady pazbaŭleńnia voli ŭ kałonii ahulnaha režymu. Adrazu paśla aryštu ŭ śniežni 2010 hoda ŭ jaho abvastrylisia chraničnyja zachvorvańni, u lipieni jamu zrabili apieracyju na pazvanočniku ŭ 5-j kliničnaj balnicy Minska. U kancy studzienia hetaha hoda Bandarenku ŭzmacnili žorstkaść umoŭ utrymańnia ŭ kałonii, niahledziačy na ciažki stan zdaroŭja. Asudžanamu, u pryvatnaści, zabaranili karystacca kastylom, na jaki jon abapiraŭsia pry chadźbie, nasić miakki abutak, jaki jamu pieradała žonka, abaviazali vychodzić na pracu, na pavierku na plac, chadzić u strai.

1 lutaha Źmicier Bandarenka padaŭ prašeńnie ab pamiłavańni na imia Alaksandra Łukašenki. Paśla hetaha jamu dazvolili karystacca kastylom.

Kamientary da artykuła