Minčuka aryštavali za maciuki na adras «Biełtelekama»

Jon atrymaŭ piać sutak.

37-hadovy žychar horada raśpisaŭ niecenzurnymi słovami ofis «Biełtelekama», pakryŭdžany tym, što kampanija nie zabiaśpiečyła jamu ŭstojlivaje złučeńnie.

Praviednaja pomsta paviarnułasia administracyjnym spahnańniem: mužčyna atrymaŭ 5 sutak aryštu, piša onliner.by.

Pa słovach pres-aficera Centralnaha RUUS Śviatłany Kabkovaj, načny volny čas hora-hraficist pravodziŭ za prahladam internet-staronak. U niejki momant dostup pierapyniŭsia. Karystalnik patelefanavaŭ siabru i daviedaŭsia, što ŭ taho takija ž prablemy. Jašče bolš raźlutavany, jon zachacieŭ asabista razabracca, što ž adbyłosia.

Narodny «mściviec» uziaŭ taksi i ŭ dźvie hadziny nočy pajechaŭ da ofisa «Biełtelekama» na vulicu Enhielsa. Dźviery, zrazumieła, byli začynienyja. Tady mužčyna dastaŭ čyrvony markier i pačaŭ pisać na akonnych raletach ofisa. Tekst nadpisaŭ nie raskryvajecca.

Karystalniku interneta nie pašancavała. U hety čas pobač z budynkam stajaŭ aŭtobus, u jakim znachodzilisia supracoŭniki milicyi. Jany zatrymali «hraficista» i dastavili ŭ Centralnaje RUUS. Tam na jaho skłali administracyjny pratakoł. Sud vyrašyŭ pakarać jaho piaćciu sutkami aryštu. Ciapier jon znachodzicca ŭ Centry izalacyi pravaparušalnikaŭ HUUS Minharvykankama.

Kamientary da artykuła