«Čorny śpis»: Stefanoviča nie vypuścili ź Biełarusi

Jamu skazali, što vyjezd za miažu dla jaho zabaronieny – jaho proźvišča značycca ŭ bazie źviestak nievyjaznych hramadzianaŭ.

Na fota -- uračystaści ŭ Vilni z nahody Dnia adnaŭleńnia niezaležnaści, ru.delfi.lt

Jak paviedamiŭ Radyjo Svaboda sam pravaabaronca, razam z žonkaj i dvuma dziećmi jon pa asabistych spravach nakiroŭvaŭsia ŭ Vilniu.

Na punkcie propusku biełaruska-litoŭskaj miažy «Kamienny Łoh», adkul na hetym tydni daviałosia viartacca dadomu i inšym apazicyjanieram, jamu skazali, što vyjezd za miažu dla jaho zabaronieny, – maŭlaŭ, jahonaje proźvišča značycca ŭ bazie źviestak nievyjaznych hramadzianaŭ.

Pryčynu abmiežavańnia prava na vyjezd Valancinu Stefanoviču pamiežniki nie ŭdakładnili, paraiŭšy źviartacca ŭ adździeł mihracyi i hramadzianstva na miescy žycharstva. Pryblizna toje ž dahetul kazali palitykam Anatolu Labiedźku, Siarhieju Kalakinu, Viktaru Karniajenku.

Pravaabaronca pierakanany, što nijakich zakonnych padstavaŭ abmiežavańnia jaho vyjezdu ź Biełarusi ŭ pravaachoŭnych strukturaŭ niama – štraf za nibyta ŭtojvańnie prybytkaŭ ad pravaabarončaj dziejnaści im vypłačany ŭ poŭnym abjomie. Tym nia mieniej, Valancin Stefanovič vymušany byŭ viarnucca ŭ Minsk.

* * *

Nahadajem, što apošnim časam pry pierasiačeńni biełaruskaj miažy ŭźnikła šmat prablem u šerahu biełaruskich hramadskich dziejačoŭ.

Tak, 7 sakavika na pamiežnym pierachodzie «Kamienny Łoh» nie puścili ŭ Litvu lidara AHP Anatola Labiedźku, Alaksandra Dabravolskaha źniali viečaram ź ciahnika. Prablemy ź viartańniem ź Litvy ŭźnikli ŭ žonki A. Labiedźki Śviatłany, jaje niekalki hadzin pratrymali na miažy.

10 sakavika na «Kamiennym Łohu» zatrymali i nie puścili ŭ Litvu hramadskaha dziejača Viktara Karniajenku i lidara partyi «Spraviadlivy śviet» Siarhieja Kalakina, skazaŭšy, što im zabaronieny vyjezd ź Biełarusi. Praŭda, potym Labiedźka, Kalakin i Karniajenka trapili ŭ Litvu inšym sposabam.

Naadvarot pry ŭjeździe ŭ Biełaruś uźnikli prablemy ŭ Mikity i Aleny Lichavidaŭ. Ich aŭtamabil i ich samich šeść hadzin treśli na miažy.

U hramadstvie chodziać čutki pra najaŭnaść čornaha śpisu sa 108 hramadskich dziejačaŭ i praavabaroncaŭ, jakim ułady zabaroniać vyjezd za miažu ŭ adkaz na sankcyi ES. MZS takija čutki abviarhaje.

***

11 sakavika ŭ Litvie adznačajuć 22 uhodki adnaŭleńnia niezaležnaści. Da ŭdziełu zaprošanyja pradstaŭniki biełaruskaj apazicyi.

Niahledziačy na sproby supracoŭnikaŭ DPK zabłakavać vyjezd ź Biełarusi dla apanientaŭ režymu, usie apazicyjnyja palityki, zaprošanyja ŭ litoŭskuju stalicu, tudy ŭsio ž trapili.

Jak paviedamlaje sajt Abjadnanaj hramadzianskaj partyi, lidar hetaj partyi Anatol Labiedźka, kiraŭnik partyi «Spraviadlivy śviet» Siarhiej Kalakin i kaardynatar kampanii «Za spraviadlivyja vybary» Viktar Karniajenka, raniej spynienyja na biełaruska-litoŭskaj miažy i raźviernutyja nazad, znajšli mahčymaść patrapić na terytoryju ES, abyšoŭšy režymnyja kardony. Voś što skazaŭ Anatol Labiedźka:

— Naš vyjezd — heta forma pratestu i adnaŭleńnia dziejańniaŭ normaŭ Kanstytucyi datyčna svajho prava na svabodnaje pieramiaščeńnie. Śpis palityčnych nievyjaznych — heta antykanstytucyjnaje rašeńnie ŭładaŭ RB.

Na dumku spadara Labiedźki, ułady pravodziać taktyku kropkavaha abmiežavańnia na vyjezd dla apazicyjnych aktyvistaŭ, pakolki biełaruska-litoŭskuju miažu bieśpieraškodna pierasiekli kiraŭniki Partyi BNF Alaksiej Janukievič i Ryhor Kastusioŭ, pradstaŭniki ruchu «Za Svabodu!» Juraś Hubarevič i Alaksiej Kavalec. Mahčyma, robić vysnovu lidar AHP, takim čynam ułada imkniecca ŭbić klin ŭ apazicyju: maŭlaŭ, adnym na miažy — zialonaje śviatło, inšym — čyrvonaje, paviedamlaje Radyjo Svaboda.

Kamientary da artykuła