Maładafrontaŭcu Jaromienku pahražaje previentyŭny nahlad

Byłoha palitviaźnia mohuć abmiežavać u pierajezdach.

Uładzimir Jaromienak. Fota kurier.me.

Jak paviedamiła pravaabaronca Nasta Łojka, 15 sakavika (čaćvier) adbudziecca sudovaje pasiadžeńnie, na jakim budzie razhladacca pytańnie ab ustalavańni previentyŭnaha nahladu za Uładzimiram Jaromienkam. Padstavaj stali jaho čatyry administracyjnyja parušeńni.

Asoba, za jakoj ustanoŭleny previentyŭny nahlad, abaviazanaja źjaŭlacca pa vyklikach u orhany ŭnutranych spraŭ i davać tłumačeńni pa pytańniach vykanańnia patrabavańniaŭ previentyŭnaha nahladu; papiaredzić orhan unutranych spraŭ ab źmienie miescaŭ pracy i žycharstva; vyjazdžać za miežy rajona (horada) tolki sa zhody orhana ŭnutranych spraŭ. Pry hetym upaŭnavažanyja supracoŭniki mohuć prychodzić da takoj asoby ŭ luby čas sutak. Pry troch pravaparušeńniach pad previentyŭnym nahladam moža być raspačata kryminalnaja sprava.

Łojka adznačyła, što

pamiłavańnie palitviaźniaŭ Łukašenkam nie aznačaje ich reabilitacyju — sudzimaść ź ich nie źniataja.

I tamu jany znachodziacca na prafiłaktyčnym uliku ŭ orhanach unutranych spraŭ.

Pravaabaronca ličyć, što taki chutki razhlad spravy Jaromienki spatrebiŭsia dla taho, kab spynić aktyŭnaść maładafrontaŭca pierad 25 Sakavika. Nasta Łojka nie vyklučaje, što previentyŭny nahlad moža być vykarystany i da inšych aktyvistaŭ. Tak,

kali siońnia znoŭ asudziać Paŭła Vinahradava, heta budzie padstava dla takich samych mier.

11 sakavika sud Leninskaha rajona Minska pryznaŭ Uładzimira Jaromienku vinavatym va ŭdziele ŭ niesankcyjanavanym mierapryjemstvie — u akcyi «Padciaryjesia!». Jon adbyvaje 15 sutak. Raniej Jaromienka jašče trojčy byŭ asudžany na administracyjnyja aryšty.

Za ŭdzieł u mirnaj akcyi pratestu 19 śniežnia 2010 Uładzimira Jaromienku adpravili na 3 hady ŭ kałoniju. Letaś jaho pamiłavaŭ Łukašenka.

Razhlad spravy adbudziecca ŭ sudzie Pieršamajskaha rajona Minska (vuł. Tałbuchina,9) a 14.00 15 sakavika.

Kamientary da artykuła