Łukašenka: U Biełarusi nie buduć dadatkova drukavacca hrošy, kab nie paŭtaryć finansavy kryzis
Jon taksama zapeŭniŭ, što piensijny ŭzrost pakul pavyšacca nie budzie.
U Biełarusi nie buduć dadatkova drukavacca hrošy dla vypłaty zarabotnaj płaty, zajaviŭ Alaksandr Łukašenka na naradzie pa pytańni ŭdaskanaleńnia piensijnaha zabieśpiačeńnia hramadzian.
«Nichto drukavać hrošy dla vypłaty zarobku nie budzie. Bo my paŭtorym znoŭ hety finansavy kryzis, jaki ŭ nas byŭ u minułym hodzie»,— skazaŭ jon.
Łukašenka taksama paabiacaŭ, što Biełaruś pakul nie pojdzie na pavyšeńnie piensijnaha ŭzrostu.
«My abiacali svaim ludziam, što my na heta pakul nie pojdziem. I ludzi prosiać nas nie rabić hetaha,— adznačyŭ jon. — Tamu, udaskanalvajučy piensijnuju sistemu, my adkidajem varyjant, jakim pajšła Jeŭropa — pavyšeńnie piensijnaha ŭzrostu. My nie možam na heta zaraz pajści».
Taksama Łukašenka skazaŭ, što razam z tym razhladajucca roznyja varyjanty pa stymulavańni ludziej da poźniaha vychadu na piensiju. «Nam treba prastymulavać piensijanieraŭ, treba dać im niejki pracent da piensii ŭ vypadku, kali jon paźniej za piensijny ŭzrost źviartajecca nakont piensii, — Łukašenka. — Nam treba značna prastymulavać, kab heta było istotna — źviartacca pa piensiju paźniej».
«My pavinny heta rabić, nie naciskajučy na ludziej i nie pavyšajučy štučna abo administracyjna piensijny ŭzrost. Hetaha rabić nielha. Nie zachacieŭ čałaviek źviartacca paźniej pa piensiju, u jaho pavinna być prava vyjści na piensiju, jak heta jość zaraz — u 55 hadoŭ u žančyn, u 60 — u mužčyn», — skazaŭ Łukašenka. «Heta značyć, my pavinny prapanavać alternatyŭny varyjant», — adznačyŭ jon.