Invalid Uładzimir Marozaŭ: Tyja, chto zrabiŭ mianie kalekam, atrymali pavyšeńnie pa słužbie

25 sakavika prychilniki demakratyčnych pieramien tradycyjna adznačyli Dzień Voli — datu abviaščeńnia Biełaruskaj Narodnaj Respubliki. Niahledziačy na drennaje nadvorje, u šeści i mitynhu ŭdzielničali, pavodle roznych padlikaŭ, ad troch da čatyroch tysiač čałaviek.

Siarod udzielnikaŭ mitynhu, jaki prajšoŭ na płoščy Banhałor, byŭ i invalid Uładzimir Marozaŭ ź Minska. Jon pryjšoŭ siudy ź viarovačnaj piatloj na šyi i vialikaj fatahrafijaj, na jakoj pakazana, jak ludzi ŭ cyvilnym navalilisia na jaho, prycisnuŭšy da ziamli.

6 lipienia 2011 hoda invalida Uładzimira Marozava supracoŭniki milicyi dušyli da straty prytomnaści kala budynka Nacyjanalnaj biblijateki. U hety dzień u stalicy prachodziła maŭklivaja akcyja pratestu.

«Zdaroŭje drennaje, skalečyli, — raskazaŭ jon. — Za tydzień splu ŭsiaho dva-čatyry dni, a z pryčyny niedasypańnia pastajannaja depresija. Uračy ničym dapamahčy nie mohuć. Sudy ŭsie prajšoŭ — nidzie praŭdy nie damohsia, zastaŭsia Viarchoŭny sud i AAN. Asoby, jakija mianie dušyli, ustanoŭleny, heta aficery Pieršamajskaha RUUS, maje susiedzi pa Uruččy. Ale ŭłada dała im za heta pavyšeńnie pa słužbie, zvańni i ŭznaharody. A mianie zrabili kalekam».

Uładzimir Marozaŭ maje treciuju hrupu invalidnaści, pakutuje ad zachvorvańniaŭ serca i lohkich, cukrovaha dyjabietu.

Kamientary da artykuła