U Žodzinie znoŭ sudziać byłoha palitviaźnia Alaksandra Małčanava
2 krasavika (paniadziełak) u Žodzinskim sudzie pačaŭsia sud nad byłym palitviaźniem Alaksandram Małčanavym i jahonym siabram Arciomam Ihnacikavym.
Chłopcaŭ abvinavačvajuć u kradziažy mietału z terytoryi miascovaha kavalskaha zavoda ciažkich štampovak. Pavodle pravaabaroncaŭ, jakija prysutničali na pieršym sudovym pasiadžeńni, Alaksandr Małčanaŭ svajoj viny ŭ kradziažy nie pryznaŭ.
Były palitviazień skazaŭ, što nie raźbiraŭ abstalavańnia, a tolki źbiraŭ iržavyja metaličnyja pradmiety na terytoryi cecha bujnoha lićcia, jaki šmat hadoŭ nie pracuje.
Patrebu zarablać, źbirajučy mietałałom, Alaksandr Małčanaŭ patłumačyŭ tym, što paśla taho jak vyzvaliŭsia z kałonii, dzie jon adbyvaŭ 3 hady za Płošču, jaho zvolnili z «BiełAZa», a bolš nikudy nie brali.
Hanna Šapućka, jakaja nazirała za pracesam, paviedamiła: «Jon abyšoŭ usio, dzie možna, ale jaho nidzie nie brali na pracu jak palityčnaha. Hetak i kazali adkrytym tekstam, što my ciabie baimsia brać. Jon časova zajmaŭsia razhruzkami, chacieŭ adnavicca na vučobu ŭ VNU, była takaja mara, ale voś daviałosia źbirać mietałałom, kab u tym liku dapamahčy i maci».
Pavodle Hanny Šapućki, na sudzie prahučała śviedčańnie supracoŭnika zavoda pra vielmi nizkija košty reštkaŭ abstalavańnia ŭ cechu. Prykładam, kran byŭ acenieny ŭ 60 tysiač rubloŭ.
Praces nad Alaksandram Małčanavym adnovicca 3 krasavika.