Mižnarodnyja pravaabaroncy patrabujuć nieadkładnaha vyzvaleńnia i lačeńnia Siarhieja Kavalenki

Mižnarodnaja fiederacyja pravoŭ čałavieka (MFPČ) zaklikaje ŭłady Biełarusi nieadkładna spynić palityčny pieraśled aktyvista Kansiervatyŭna-chryścijanskaj partyi — BNF Siarhieja Kavalenki, jaki trymaje haładoŭku, i zabiaśpiečyć jamu nieabchodnuju miedycynskuju dapamohu.

U svajoj zajavie pravaabaroncy nahadvajuć, što kryminalny pieraśled apazicyjaniera pačaŭsia paśla taho, jak 7 studzienia 2010 hoda jon vyviesiŭ na hałoŭnaj navahodniaj jołcy Viciebska nacyjanalny bieł-čyrvona-bieły ściah. Za heta Kavalenku asudzili, pryznali vinavatym pa dvuch artykułach Kryminalnaha kodeksa (naŭmysnyja dziejańni, jakija hruba parušajuć hramadski paradak i nasille ŭ dačynieńni da supracoŭnika pravaachoŭnych orhanaŭ pry vykanańni im słužbovych abaviazkaŭ) i pryhavaryli da troch hadoŭ abmiežavańnia voli. U lutym hetaha hoda apazicyjaniera abvinavacili va ŭchileńni ad adbyvańnia pakarańnia i asudzili na 2 hady i 1 miesiac pazbaŭleńnia voli.

«Publičnaja demanstracyja i vyviešvańnie Kavalenkam ściahu ni ŭ jakim vypadku nie moža kvalifikavacca jak chulihanskija dziejańni — jany źjaŭlajucca hramadska-palityčnaj akcyjaj, nie nosiać charaktaru asablivaha cynizmu i jaŭnaj niepavahi da hramadstva i nie majuć hetaha na ŭvazie»,

Paŭtornaje pryciahnieńnie Kavalenki da kryminalnaj adkaznaści «za nibyta ŭchileńnie ad adbyvańnia pakarańnia» pravaabaroncy rasceńvajuć jak «nieprykryty praciah palityčnych represij» i «sprobu dalejšaj izalacyi aktyvista apazicyjnaj partyi».

Asablivuju zaniepakojenaść MFPČ vyklikaje ciapierašni stan zdaroŭja Siarhieja Kavalenki, jaki abjaviŭ haładoŭku adrazu paśla svajho aryštu 19 śniežnia 2011 hoda. «Stan jaho zdaroŭja krytyčny. MFPČ vykazvaje apasieńnie za jaho žyćcio, a taksama surjoznuju zaniepakojenaść mahčymym prymianieńniem da jaho prymusovaha psichijatryčnaha lačeńnia», — skazana ŭ zajavie.

MFPČ zaklikaje biełaruskija ŭłady «nieadkładna i biezahavoračna vyzvalić Kavalenku, spynić jaho kryminalny pieraśled i zabiaśpiečyć jamu nieabchodnuju i nieadkładnuju miedycynskuju dapamohu ŭ kvalifikavanaj miedycynskaj ustanovie adkrytaha typu».

«Adkaznaść za žyćcio i zdaroŭje Kavalenki poŭnaściu lažyć na kiraŭnictvie Ministerstva ŭnutranych spraŭ Biełarusi, u rasparadžeńni jakoha jon zaraz znachodzicca», — padkreślivajuć pravaabaroncy.

Nahadajem, Siarhiej Kavalenka zaraz znachodzicca ŭ psichijatryčnym adździaleńni na terytoryi papraŭčaj kałonii «Vićba-3». 2 krasavika stała viadoma, što jaho prymusova kormiać praz zond. Pavodle słoŭ žonki apazicyjaniera, prymusovaje karmleńnie pačałosia 1 krasavika. Da šaści razoŭ na dzień Kavalenku ŭlivajuć dziciačuju małočnuju sumieś «Biełłakt», a taksama praciahvajuć stavić kropielnicy z hlukozaj, aminakisłotami i vitaminami. Padčas haładoŭki aktyvist apazicyi, jaki raniej važyŭ kala 83 kiłahramaŭ, straciŭ amal pałovu svajoj vahi.

Kamientary da artykuła