Kitaj pieradumaŭ inviestavać u aeraport «Minsk-2»

Maštabnaja rekanstrukcyja adkładajecca na niavyznačany termin.

Kitaj nie budzie inviestavać u aeraport «Minsk-2». Pavodle infarmacyi sajta Naviny.by, adzin z najbujniejšych inviestycyjnych prajektaŭ u historyi Biełarusi nie budzie realizavany ŭ zapłanavanym abjomie. Bolš za toje — u im, chutčej za ŭsio, nie budzie ŭdzielničać kitajskaja kampanija, jakaja vystupała hienpadradčykam. Jakaja pryčyna?

Minsk i Piekin nie zmahli pryjści da kansiensusu pa košcie hetaha inviestprajekta.

Kitajcy zapytali amal udvaja bolš

Napiaredadni čempijanatu śvietu pa chakiei Biełaruś źbirałasia rekanstrujavać Nacyjanalny aeraport «Minsk». U pryvatnaści, mierkavałasia pabudavać novy pasažyrski terminał. Sprava ŭ tym, što biełaruski aeraport uzvodziŭsia ŭ savieckija časy i byŭ adaptavany dla ŭnutrysajuznych palotaŭ. Adpaviedna, pasažyrski terminał nie prystasavany ni dla mytnaha, ni dla pamiežnaha kantrolu.

Hetaja zadača stała asabliva aktualnaj u suviazi z tym, što ŭ 2014 hodzie z-za praviadzieńnia ŭ Biełarusi čempijanatu śvietu pa chakiei čakajecca značnaje pavieličeńnie pasažyrapatoku. Tamu i płanavali budaŭnictva novaha, sučasnaha, pasažyrskaha terminała da 2014 hoda.

U ramkach rekanstrukcyi byŭ namier taksama pabudavać na terytoryi aeraporta novuju ŭźlotnuju pałasu, jakaja dazvalała b prymać navat samyja bujnyja samaloty (naprykład, aerobus A-380).

Adnak rekanstrukcyju biełaruskaha aeraporta ŭ zapłanavanych abjomach pravieści nie atrymlivajecca. «Na žal, kitajski bok admoviŭsia być hienpadradčykam», — paviedamiła daśviedčanaja krynica. Tamu rekanstrukcyja aeraporta, «chutčej za ŭsio, budzie realizoŭvacca biez udziełu kitajcaŭ».

Biełaruski bok i kitajskaja kampanija «Viektočmaš», jakaja paŭtara hodu tamu była abranaja hienpadradčykam rekanstrukcyi aeraporta, nie zmahli damovicca ab košcie realizacyi prajekta. U damovie košt rekanstrukcyi była acenieny ŭ $600 miljonaŭ. Adnak paśla kitajcy paviedamili, što aceńvajuć inviestycyjny prajekt bolš jak u $1 miljard.

Na dumku ekśpiertaŭ, vierahodna, rekanstrukcyja aeraporta budzie ažyćciaŭlacca ŭ pryncypova inšym farmacie, čym pieršapačatkova płanavałasia. Havorka moža iści ab tym, što budaŭnictva novaj uźlotnaj pałasy budzie adkładziena na niekalki hadoŭ.

A ŭ toj pieryjad, jaki zastaŭsia da čempijanatu śvietu pa chakiei, možna paśpieć rekanstrujavać isnujučy (a nie ŭźvieści novy) pasažyrski termina.

Kamientary da artykuła