Vulica Biełaruskaja
z pošty redakcyi
Pašany biełarusam ad hetaha nie bolš, čym eskimosam ad eskimo.
U Lvovie jość vulica Ruskaja. Za polskimi karalami tam było hieta dla rusinaŭ. Tolki na Ruskaj vulicy im było dazvolena vałodać nieruchomaj majomaściu.
Što ž spryčyniłasia da taho, što amal u kožnym biełaruskim horadzie jość vulica Biełaruskaja? Moža, tam byli hieta? Moža, biełarusy paasiadali tam, jak habrei na bierlinskaj Judenštrase?
Daŭniej u Viciebsku była vułka Hrazkaja. Savieckaja ŭłada prydumała dla Hrazkaj novuju nazvu — Biełaruskaja, u honar tytulnaj nacyi. A ŭ Homieli Biełaruskaja — byłaja Piasočnaja. Zaletaś hraź na joj nakryli asfaltam, kab razhruzić susiedniuju mahistral, ale na zachadzie mašyny zbočvajuć ź jaje, i vulica viadzie na kałdobinach na zadvorki šmatpaviarchovych damoŭ da transfarmatarnaj budki i kantejnieraŭ sa śmiećciem. Kala płotu kančajecca Biełaruskaja vulica ŭ Lidzie.
Pašany biełarusam ad hetaha nie bolš, čym eskimosam ad eskimo, irakiezam ad fryzury pankaŭ, a šatłandcam ad amierykanskaj klejkaj stužki, jakuju dziela aniekdota nazvali skotč — šatłandskaja.
A čamu ž u Vilejcy niama Biełaruskaj vulicy? Reč u tym, što nie tolki balšaviki, ale i fašysty dziela voka nibyta apiekavałasia biełarusami. U Vilejcy u svoj čas hitleraŭcy nazvali Biełaruskaj byłuju vulicu Piłsudskaha. Praz try hady kamunisty pierajmienavali jaje ŭ Savieckuju, a pieranosić nazvu z najstaražytnaj vulicy horada ŭ hłuchi zakutak nie stali — kryvadušnaść kidałasia b u vočy.
Pa ŭsim śviecie — ad Marsiela da Sinhapura — jość Armianskija vulicy. U Armienii — niama. Bo vydumać Armianskuju vulicu tam usio roŭna, što nazvać vinahradnym armianskaje vino. A naš etnonim u nazvach našych vulic pryličyli da adnoj katehoryi ź imionami mienšavika Plachanava i Ścieńki Razina, byccam biełarusy nie tytulnaja nacyja, a niejkaja ekzotyka, pra jakuju treba nahadvać, kab nie zabycca na jaje, nakštałt vyšyvanych ručnikoŭ na viasielli, dzie z dynamikaŭ ravie Hazmanaŭ praz «Rośsiju i svobodu do konca».