Zbornaja Biełarusi vyjhrała matč Kubka Devisa suprać kamandy Bośnii i Hiercahaviny
Mužčynskaja zbornaja Biełarusi pa tenisie vyjhrała matčavuju sustreču druhoha raŭndu II hrupy Jeŭra-Afrykanskaj zony Kubka Devisa suprać kamandy Bośnii i Hiercahaviny. 8 krasavika pieršy numar biełarusaŭ Uładzimir Ihnacik (275-y ŭ suśvietnym adzinočnym rejtynhu) pieramoh pieršaha numara baśnijcaŭ Amiera Deliča (210) i zrabiŭ ahulny lik matčavaj sustrečy 3:1 na karyść biełarusaŭ.
Supraćstajańnie Ihnacika i Deliča było ŭpartym, asabliva pieršy set. Jon praciahvaŭsia bolš za hadzinu i zaviaršyŭsia na taj-brejku ź likam 18:16 na karyść biełarusa. Pry hetym Ihnacik prajhravaŭ na taj-brejku 1:6, ale Delič nie zdoleŭ realizavać 5 setbołaŭ i ŭ vyniku ŭstupiŭ jak u secie, tak i ŭ matčy. Ihnacik pieramoh u troch partyjach za 2 hadziny 49 chvilin — 7:6, 7:6, 6:4.
Nahadajem, u pieršy hulniavy dzień 6 krasavika ŭ asobnych pajadynkach druhi numar biełarusaŭ Dźmitryj Žyrmont (576) ustupiŭ Deliču – 4:6, 4:6, 6:4, 5:7, a Ihnacik byŭ macniejšy za druhi numar baśnijcaŭ Damira Dzumchura (292) — 6:3, 7:6, 6:3.
U parnym pajadynku 7 krasavika biełarusy Maksim Mirny (3-ci numar parnaha rejtynhu) i Alaksandr Bury (175-y parnaha) pieramahli baśnijcaŭ Deliča (357-y parnaha) i Tamisłava Brkiča (611-y parnaha) — 6:2, 7:6, 7:6.
Takim čynam, zaklučnaja hulnia matčavaj sustrečy, u jakoj 8 krasavika pavinny sustrecca Žyrmont i Dzumchur užo nie maje nijakaha turnirnaha značeńnia.
U nastupnym raŭndzie biełarusy ŭ vieraśni 2012 hoda sustrenucca z kamandaj Polščy, jakaja abyhrała estoncaŭ. Pieramožca supraćstajańnia biełarusaŭ i palakaŭ vyjdzie ŭ I hrupu Jeŭra-Afrykanskaj zony Kubka Devisa.
U rejtynhu Kubka Devisa da ich vočnaha matču zbornaja Biełarusi zajmała 49-je miesca, kamanda Bośnii i Hiercahaviny — 43-je.