U Minskaj vobłaści pustujuć 72 damy, pabudavanyja pa prezidenckaj prahramie

Zavablivajučy maładych śpiecyjalistaŭ na pieryfieryju, dziaržava abiacaje mamientalnaje vyrašeńnie žyllovaha pytańnia.

Niekalki hadoŭ tamu ŭ krainie była zaćvierdžanaja prezidenckaja prahrama adradžeńnia vioski, jakaja ŭklučaje budaŭnictva siadzibnych i adnakvaternych damoŭ dla tych, chto pryjechaŭ pa raźmierkavańni, i ich siemjaŭ. Adnak, jak vyśvietliłasia, mnohija katedžy prastojvajuć hadami biez žycharoŭ. Moładź paprostu nie choča jechać na viosku, dzie nizki ŭzrovień apłaty pracy i niama hodnaj infrastruktury.

Jak paviedamlaje telekanał «Biełaruś-1», niadaŭna śpiecyjalisty Kamiteta Dziaržkantrolu praviali pravierku ŭ Červienskim rajonie. U samim rajcentry dva hady pustuje katedž dla ahraryjaŭ, na budaŭnictva jakoha pajšło bolš za 100 tysiač dalaraŭ. Achvotnych pasialicca ŭ im niama, addačy nijakaj, a miascovaja haspadarka štohod vypłačvaje banku za kredyt bolš za 20 miljonaŭ rubloŭ.

Jašče dva prablemnyja damy revizory vyjavili ŭ vioscy Hrabianiec.

— Hety nasieleny punkt istotna addaleny ad centralnaj siadziby. Tam niama pierśpiektyvy, i maładyja ludzi asabliva tudy sialicca nie chočuć, — kaža Siarhiej Macuk, načalnik upraŭleńnia Kamiteta dziaržkantrolu Minskaj vobłaści.

Siońnia ŭ Minskaj vobłaści 72 niezapatrabavanyja novyja damy. Sialić siudy mohuć nie ŭsich azvotnych, a tolki ahraryjaŭ-prafiesijanałaŭ i maładych śpiecyjalistaŭ. Dla astatnich katehoryj hramadzian, jakija chočuć pierabracca ŭ viosku, u najbližejšaj budučyni mohuć prapanavać inšy varyjant: pasialicca ŭ apuściełych damach. Takuju inicyjatyvu ahučyŭ niadaŭna namieśnik staršyni Minskaha abłvykankama Anatol Mirčuk. Pakul pierśpiektyvy hetaj idei zdajucca sumnieŭnymi.

Kamientary da artykuła