U Hrodnie źnieśli «Dom Bieklamišava»

15.05.2012 / 11:40

Aleś Kirkievič, Hrodna

12 maja nie stała ŭnikalnaha pomnika «draŭlanaha» kanstruktyvizmu mižvajennaha času ŭ Novym Śviecie.

"Dom Bieklamišava" ŭ 1940-ja.

Tak jon vyhladaŭ u 2009-m.

12 maja 2012 dom byŭ źniščany.

Budynak pa vuł. Astroŭskaha 15, u jakim ciaham apošnich hod mieściŭsia endakrynałahičny dyspansier, naležaŭ kaliści viadomamu rodu Bieklamišavych.

Z prychodam savieckaj ułady, u 1940 h. zamožnaja siamja była vysłanaja ŭ Kazachstan, dzie dypłamavany lekar Mikałaj Bieklamišaŭ na pačatku pracavaŭ prycepščykam traktarysta. Paśla vajny, adnak, ssylny miedyk zdoleŭ viarnucca da prafiesii: doktar miedycynskich navuk (1955), prafiesar (1958), akademik (1975), zasłužany dziejač navuki Kazachstana (1962), pieršy łaŭreat Dziaržaŭnaj premii ŭ halinie miedycyny (1980)… U 2005 h., praz dva hady pa śmierci akademika, u Kazachstanie prajšli pieršyja «Bieklamišaŭskija čytańni». U 1980-ja na hrodzienskim domie Bieklamišavych chacieli zamacavać pamiatnuju šyldu, adnak, jak zaŭždy, niešta nie pajšło.

Dakumienty i materyjały na ŭklučeńnie budynka ŭ śpis pomnikaŭ byli padrychtavanyja hrodzienskimi historykami

i pieradadzienyja ŭ vyhladzie zajaŭki va Upraŭleńnie pa achovie historyka-kulturnaj spadčyny i restaŭracyi pry Ministerstvie kultury jašče minułaj vosieńniu. Pytańnie, adnak, dahetul nie vyniesiena na razhlad.

Hledziačy pa ŭsim, horad zaraz uvachodzić u pieryjad, anałahičny 2005–07 h., sumna viadomy šmatlikimi znosami i źniščeńniem archieałahičnych słajoŭ u histaryčnym centry, što vyklikała tady burlivuju reakcyju hramadskaści dy akcyi pratestu.

Tolki na minułym tydni «Dom Bieklamišava» staŭ trecim źniaviečanym budynkam u kvartale aryhinalnaj mižvajennaj zabudovy Novy Śviet.

Jak kažuć historyki,

pra turystyčnuju pryvabnaść rajona chutka ŭžo niemažliva budzie kazać — ničoha nie zastaniecca.

Čytajcie taksama:

Kamientary da artykuła