Ekołahi nie pahadzilisia z Łukašenkam
Ekołahi zaklikajuć nasielnictva Biełarusi admovicca ad spalvańnia bytavych adchodaŭ na prysiadzibnych učastkach.
Jak zajaviŭ 15 maja na pres-kanfierencyi ŭ Minsku kaardynatar prajekta pa adchodach ustanovy «Centr ekałahičnych rašeńniaŭ» Anatol Kałač, isnuje niekalki pryčyn dla admovy ad spalvańnia bytavych adchodaŭ na prysiadzibnych učastkach: tempieratura vohnišča niedastatkovaja dla źniščeńnia mnohich vidaŭ adchodaŭ, u tym liku płastykavych; pry spalvańni adchodaŭ u pavietra vydzialajucca kancerahiennyja rečyvy, jakija nazapašvajucca ŭ arhaniźmie i zdolnyja prynieści značnuju škodu zdaroŭju, u tym liku dla naščadkaŭ. Pry spalvańni humavych adchodaŭ vydzialajucca popieł i saža, jakija asiadajuć na ŭčastku i ŭ dalejšym mohuć trapić u ježu dačnikaŭ.
Kałač adznačyŭ, što nie varta spalvać u lasach adchody, jakija ŭtvarylisia, naprykład, paśla piknika.Hetym samym nanosicca ŭron jak zdaroŭju ačyščalnikaŭ lesaparkavaj zony, tak i navakolnamu asiarodździu. Lepš za ŭsio takija adchody pachavać.
Tym časam 25 krasavika padčas rabočaj pajezdki ŭ Mahiloŭskuju vobłaść Alaksandr Łukašenka zajaviŭ pra nieabchodnaść dać mahčymaść ludziam spalvać śmiećcie na svaich prysiadzibnych učastkach.
Jak paviedamiŭ pres-sakratar MNS Vital Navicki, na nastupny dzień paśla hetaha byli ŭniesieny źmieny ŭ praviły pažarnaj biaśpieki. Zaraz dapuskajecca padkantrolnaje raźviadzieńnie vohniščaŭ dla spalvańnia śmiećcia i adchodaŭ na placoŭkach.Pry hetym placoŭki pavinny być abramleny ačyščanaj ad minieralnaha słoju hlebaj pałasoj, šyrynia jakoj nie mienš za 0,25 m. Spalvać adchody dapuščalna pry słabym vietry i pry zachavańni nastupnych adlehłaściaŭ: 15 m ad budynkaŭ i zbudavańniaŭ, 20 m ad lasnoha masivu, 30 m ad miescaŭ, dzie składujecca siena ci sałoma. Dadatkova ŭ praviłach ukazana, što na prysiadzibnych učastkach dapuskajecca padrychtoŭka ježy ŭ śpiecyjalnych prystasavańniach na minimalnaj adlehłaści da budynkaŭ i zbudavańniaŭ nie mienš jak 4 m.
Načalnik adździeła ziamiel i łandšaftaŭ Ministerstva pryrodnych resursaŭ i achovy navakolnaha asiarodździa Andrej Kuźmič nie rekamienduje spalvać bytavyja adchody na prysiadzibnych učastkach: "Usio ž treba dumać pra tuju škodu, jakaja pry hetym nanosicca jak navakolnamu asiarodździu, tak i niepasredna zdaroŭju ludziej". Pavodle jaho słoŭ, na prysiadzibnych učastkach možna spalvać tolki lasnyja reštki.