Maryna Adamovič: Na Statkieviča ŭzmocniŭsia cisk
Na byłoha kandydata ŭ prezidenty, palityčnaha źniavolenaha Mikałaja Statkieviča, u mahiloŭskaj turmie №4 uzmacniŭsia cisk. Takuju vysnovu zrabiła žonka palityka Maryna Adamovič paśla atrymańnia apošnich listoŭ ad palityka.
Jaje naściarožyła adna fraza z apošniaha lista.
- «Apošnim časam znoŭ pačalisia pošuki niejkich «niedachopaŭ». Jon słova niedachopy biare ŭ dvukośsie. Vidać, heta vielmi klučavy skaz. Jon piša, što heta ŭsio prachodziŭ užo ŭ Škłovie, tamu jaho nie kranaje. Adzin uspamin ab Škłovie vyklikaje ŭ mianie sudarhavuju reakcyju. Toje, što tam adbyvałasia, možna acharaktaryzavać skazam, jaki ŭ internecie pračytała. Niechta ź jaho adrasataŭ apublikavaŭ Mikołaŭ list. "Što tolki nie rabili, tolki dustam nie sprabavali».
Pa słovach Maryny Adamovič, infarmacyja heta vielmi tryvožnaja, chacia i čakanaja. «Šerah padziej vymušajuć ułady i administracyju turmy niervova reahavać. Heta i abiacanaja amnistyja, chacia Mikoła Statkievič adnaznačna skazaŭ, što jon pad jaje nie traplaje. Vielmi daremna i drenna raźličvać siońnia na amnistyju. Heta samasupakojvaje i biełarusaŭ, i jeŭrapiejcaŭ. Znoŭku pačynajecca čakańnie, źmianšajecca cisk i ŭzrovień patrabavańniaŭ. Taksama nabližajecca termin, kali zhodna z kryminalna-vykanaŭčym kodeksam pavinna być razhledžana mahčymaść pieravodu Statkieviča z turmy na ahulny režym – i heta moža być adnoj z pryčyn cisku», -- miarkuje Maryna Adamovič.