Jabłyki i jabłyni: pra nacystaŭ i ich dziaciej

20.06.2012 / 12:23

Aleś Čajčyc

Naščadki nacyjanał-sacyjalistyčnych i savieckich złačyncaŭ pa-roznamu staviacca da svaich prodkaŭ.

Pieršy kanał niamieckaj televizii ARD pakazaŭ dakumientalny film pra naščadkaŭ viarchoŭnych nacysckich kiraŭnikoŭ — «Maja siamja, nacysty i ja» izrailskaha režysera Chanocha Zeevi.

U im idziecca pra dziaciej i ŭnukaŭ nacysckich złačyncaŭ. Hałoŭnyja hieroi — unučataja plamieńnica Hienrycha Himlera, dačka kamiendanta kancłahiera «Płašuv» Amona Hiota (viadomaha pa filmie «Śpis Šyndlera»), unuk kamiendanta Aśviencima Rudolfa Hiosa, unučataja plamieńnica Hiermana Hiorynha. Hieroi dzielacca svaimi ŭspaminami, svaimi pieražyvańniami ab tym, što heta aznačaje — być blizkim svajakom ludziej, jakija asudžanyja ŭsim śvietam jak najhoršyja złačyncy i katy.

Kali vałodajecie niamieckaj movaj, pahladzicie:

Možna i skazać, što niekatoryja z hetych ludziej iduć zanadta daloka —

unučataja plamieńnica i ŭnučaty plamieńnik Hiermana Hiorynha vyrašyli sterylizavać siabie, kab nie praciahvać rod Hiorynhaŭ. Syn hienierał-hubiernatara akupavanaj Polščy pryśviačaje žyćcio napisańniu knih, poŭnych nianaviści i źniavahi ŭ dačynieńni da svajho ŭłasnaha baćki. «Kali b ja jaho sustreŭ, ja b jaho ŭłasnymi rukami zabiŭ», kaža skroź ślozy ŭnuk kamiendanta Aśviencima pra svajho dzieda.

Takoje staŭleńnie da rodnych tabie ludziej składana ŭmiaścić u hałavie. Składana da taho samaha momantu, pakul my nie ŭspomnim, jak

unuk savieckaha narkama Mołatava, deputat Dziaržaŭnaj dumy RF ad partyi «Adzinaja Rasija» Viačasłaŭ Nikanaŭ padkreślivaje, što Napaleon nibyta źniščyŭ bolš ludziej, čym Stalin,

i jak hety čałaviek praz 70 hod paśla pakta Mołatava-Rybientropa zajmaje pasadu staršyni fonda «Russkij mir», što zajmajecca prasoŭvańniem rasijskaha kulturnickaha ŭpłyvu ŭ zamiežžy.

Hetaksama ŭnuk Fieliksa Dziaržynskaha uschvalaje ideju adnaŭleńnia pomniku «žaleznamu Fieliksu» na Łubianskaj płoščy ŭ Maskvie i ličyć svajho dzieda, zasnavalnika ČK-NKVD, «hierojem».

Unuk Stalina Jaŭhienij Džuhašvili padaŭ u sud na libieralnuju radyjostancyju «Echo Moskvy» za abrazu pamiaci jahonaha dzieda-tyrana. Na ščaście, sud Džuhašvili ŭsio ž prajhraŭ. Ale jość va ŭsim hetym niešta vielmi, vielmi niapravilnaje.

Poruč ź vieteranami Druhoj suśvietnaj na 9 traŭnia pa vulicach postsavieckich haradoŭ maršyrujuć sotni vieteranaŭ NKVD, jakija padaŭlali paślavajennuju partyzanku i achoŭvali savieckija kancłahiery ŭ 40-ja — 50-ja hh.

Bieźlič hienierałaŭ NKVD i kamiendantaŭ łahiaroŭ HUŁAH spakojna dažyli da cichaj ščaślivaj śmierci na svaich namienkłaturnych dačach — voźmiem, skažam, choć kamandantaŭ BiełBałtŁaha Uśpienskaha ci Cimafiejeva, jakija tak i nie pabačyli ziamnoha suda i pahatoŭ šybienicy, jak ichnyja nacyjanał-sacyjalistyčnyja «tavaryšy».

Niamieččyna pieramahła fašyzm unutry siabie. My ŭ Rasii i ŭ Biełarusi svoj ułasny fašyzm tak i nie pieramahli — jon tak i zastajecca pieramožcam.

Čytajcie taksama:

Kamientary da artykuła