Major Dziamidaŭ choča žyć spakojna

Doŭhaje recha viciebskich vybuchaŭ.

U krasaviku 2011 siłaviki paviedamili pra zatrymańnie padazravanych pa vybuchu ŭ minskim mietro. Tolki z časam pastupova stała źjaŭlacca i infarmacyja pra ich. Proźviščy, miescy pracy, znajomstvy. Praviarali ŭsich, chto byŭ niejkim bokam źviazany z Kanavałavym i Kavalovym.

Častkova vyniki takich pravierak stanavilisia viadomymi. Tak, u kancy maja paviedamili pra zvalnieńnie dyrektara Viciebskaha zavoda traktarnych zapasnych častak Uładzimira Fiedarenki. Jaho paličyli vinavatym u niezabieśpiačeńni patrebnych pakaźnikaŭ sacyjalna-ekanamičnaha raźvićcia pradpryjemstva, a taksama nizkim ŭzroŭni pracoŭnaj i vytvorčaj dyscypliny, bieskantrolnaści zachavańnia materyjalnych kaštoŭ-naściaŭ, chibach u ideałahičnaj pracy.

Na hetym zavodzie pracavaŭ Dźmitryj Kanavałaŭ. Padčas papiaredniaha śledstvu jon śviedčyŭ, što mietaličnaje načyńnie dla vybuchoŭki ŭziaŭ na pradpryjemstvie.

Tamu nichto nie sumniavaŭsia, što sprava vybuchu i zvalnieńnie dyrektara źviazanyja.

Na Fiedarenku jašče i kryminalnuju spravu zaviali. Abvinavacili ŭ kradziažy šlacham złoŭžyvańnia słužbovymi paŭnamoctvami, ździejśnienym paŭtorna albo hrupaj asobaŭ pa papiaredniaj zmovie. Ale da suda sprava nie dajšła. Dakładniej, sudzili byłoha dyrektara pa administracyjnaj spravie.

«Pa vynikach rasśledavańnia vyniesiena pastanova ab vyzvaleńni abvinavačanaha Fiedarenki ad kryminalnaj adkaznaści ŭ suviazi z prymianieńniem mier administracyjnaha spahnańnia na padstavie p.3 č.1 art.30 KPK i art. 86 KK, pakolki jon upieršyniu ździejśniŭ mienš ciažkaje złačynstva i całkam kampiensavaŭ naniesienuju škodu», — paviedamili ŭ Hienieralnaj prakuratury. Sumu škody, praŭda, nie nazvali, a voś štraf prysudzili spahnać z načalnika Kanavałava ŭ pamiery 10 bazavych vieličyń (350 tys. rub. na toj čas).

Kaho pakarali — viedać nieabaviazkova

Pra sudy nad milicyjantami (tym, chto nie ŭziaŭ u Dźmitryja Kanavałava adbitki palcaŭ i tym, chto nie pravieryŭ jaho sumku pry ŭvachodzie ŭ mietro 11 krasavika), choć i sa spaźnieńniem, ale paviedamili. A voś pra pakarańnie tych, chto niezakonna miesiacami ŭtrymlivaŭ ludziej za kratami pa spravie vybuchaŭ, prakuratura maŭčyć i siońnia.

Paśla vybuchaŭ u Viciebsku ŭ vieraśni 2005 paviedamlałasia pra pieciarych zatrymanych. Pa niekatoraj infarmacyi, hetych ludziej chutka adpuścili, bo jany nie mieli dačynieńnia da spravy. Ale zatrymali novych — bratoŭ Vitala i Juryja Muraškaŭ, jakim i pradjavili abvinavačvańnie. Ich pratrymali za kratami ad 30 vieraśnia 2005 da 31 sakavika 2006. Vypuścili ž pad padpisku ab niavyjeździe. Ale navat praz dva miesiacy paśla ich vychadu na svabodu staršynia KDB Ściapan Sucharenka zajaŭlaŭ, što «jany majuć da vybuchaŭ dačynieńnie, ale śledstva jašče vyznačyć stupień ich udziełu ŭ hetaj spravie». U vyniku z bratoŭ byli źniatyja abvinavačvańni i im vypłacili kampiensacyju. A Sucharenku praz hod adpravili ŭ adstaŭku.

U spravie Muraškaŭ byŭ i łžeśviedka Alaksiej Buda. Paźniej užo jon zajaviŭ, što davaŭ pakazańni suprać svaich znajomych pad pahrozaj fizičnaj raspravy z boku supracoŭnikaŭ pravaachoŭnych orhanaŭ.

U kastryčniku 2006 pa spravie vybuchaŭ zatrymali i aktyvista apazicyi Paŭła Krasoŭskaha. A zatym jaho rezka «zapadozryli» ŭ zabojstvie i zhvałtavańni. Chłopiec pravioŭ za kratami dziesiać dzion. U vyniku i ź jaho źniali ŭsie abvinavačvańni.

Chto panios pakarańnie za pamyłki, zroblenyja padčas śledstva? Padatkapłacielščykam heta viedać nieabaviazkova. Tak ličać u Hienieralnaj prakuratury. Na adpaviedny zapyt z hetaj ustanovy pryjšoŭ nastupny adkaz: «Dakumienty pa vynikach słužbovych rasśledavańniaŭ, a taksama źviestki, jakija ŭtrymlivajucca ŭ dakumientach ab pracy pa raskryćci złačynstvaŭ i rasśledavańni kryminalnych spraŭ, pa pytańniach prakurorskaha nahladu za vykanańniem zakanadaŭstva pry ažyćciaŭleńni papiaredniaha śledstva źjaŭlajucca słužbovaj infarmacyjaj abmiežavanaha raspaŭsiudžvańnia, u suviazi z čym nie mohuć być Vam pradstaŭleny». Heta aznačaje, što nie mohuć paviedamić pra milicyjanta, jaki pajšoŭ na złačynstva, kab atrymać patrebnyja pakazańni. A nieviadomaść prymušaje sumniavacca ŭ ich pakarańni.

Chočuć spakojna žyć

Situacyju pa viciebskich vybuchach, napeŭna, moh by prajaśnić i jašče adzin fihurant spravy — major KDB Andrej Dziamidaŭ. Jon uvachodziŭ u hrupu pa rasśledavańni viciebskich vybuchaŭ pakul sam nie staŭ abvinavačanym. U 2007 jon niekalki miesiacaŭ pravioŭ i SIZA. «NN» pasprabavała pahavaryć ź Dziamidavym. Ale, pa słovach jaho žonki Natalli, muž nie budzie razmaŭlać z žurnalistami. Maŭlaŭ, jany chočuć spakojna žyć.

Tady ž, u 2007, rodnyja majora, kali adčuli, što jaho mohuć pasadzić nadoŭha, pajšli na kantakt ź niezaležnaj presaj.

Prysud pa kryminalnaj spravie vybuchaŭ u Minsku i Viciebsku vynieśli paŭhoda tamu. Dva miesiacy nazad Kanavałava i Kavalova rasstralali.

Kamientary da artykuła