Jak čałavieka ci jak čynoŭnika?
Sudziać byłoha namieśnika staršyni Viciebskaha abłvykankama Leanida Kavalova.
Paśla taho jak jašče ŭ červieni minułaha hoda źjaviłasia infarmacyja pra mahčymaje zatrymańnie Kavalova, raptoŭna nastupiła poŭnaja cišynia. A zatrymańnie ž čynoŭnika takoha ranhu — niačastaja źjava dla krainy.
U sakaviku my źviarnulisia va UKDB pa Viciebskaj vobłaści, kab daviedacca pra los byłoha čynoŭnika. Mienavita hetaj struktury prypisvaŭsia jaho aryšt. Ale tam paraili źviartacca ŭ Centr infarmacyi i hramadskich suviaziaŭ KDB. Padobny zvarot byŭ nakiravany ŭ CIHS. Ale nijakaha adkazu i ciapier, praz try miesiacy, tak i nie atrymali.
Sproba daviedacca niešta ŭ Viciebskim abłvykankamie taksama ni da čaho nie pryviała. Kali my nabrali numar byłoha pamočnika Kavalova i paprasili zapisać nas da jaho na pryjom, pavisła paŭza. Tolki paśla niepraciahłaj razmovy paviedamili, što čynoŭnik bolš nie pracuje. Pa pytańniach, jakija nam zadavali, skłałasia ŭražańnie, što supracoŭnikaŭ rajvykankama prainstruktavali nakont padobnych telefanavańniaŭ.
Dziŭnym padałosia pytańnie: «Vam paraili źviarnucca da Leanida Leanidaviča jak da čałavieka (nibyta namiakajučy na niešta) albo jak da čynoŭnika?»
Zatym byŭ zvarot u prakuraturu Viciebskaj vobłaści. Adkaz pryjšoŭ akurat tady, jak stała viadoma, što su-dziać eks-namieśnika hubiernatara ŭ Minskim haradskim sudzie. Z prakuratury ž adkazali, što «kryminalnaja sprava ŭ adnosinach da Kavalova pravaachoŭnymi orhanami vobłaści nie rasśledavałasia». Heta značyć, što spravu byłoha čynoŭnika kuryravali ź Minska? My źviarnulisia da pravaabaroncy Aleha Voŭčaka, jaki raniej pracavaŭ śledčym prakuratury. Jon patłumačyŭ, što praktyka ź pieranakiravańniem spravy ŭ inšy sud zdarajecca, chacia i niačasta.
Pa jaho słovach, u spravie Kavalova moža być minski epizod albo navat usia sprava źviazanaja sa stalicaj. Jašče jak varyjant — sud adbyvajecca ŭ Minsku, kab harantavać niepraduziataść.
Što da sakretnaści, to jaje navat nie admaŭlajuć. U Minskim haradskim sudzie paviedamili, što sprava niekalki miesiacaŭ jak prypyniena, bo čakajuć vyniki niejkich ekśpiertyz. I praces adkryty. Ale inšuju infarmacyju admaŭlajucca paviedamić, spasyłajučysia na zahad staršyni suda.
***
Leanid Kavaloŭ naradziŭsia ŭ 1975 u Baranavickim rajonie. Na pasadu namieśnika staršyni Viciebskaha abłvykankama byŭ pryznačany ŭ śniežni 2009. Da hetaha pracavaŭ namieśnikam staršyni Viciebskaha harvykankama, načalnikam upraŭleńnia spravami Minabłvykankama.
U 2007-m, kali byŭ pieršym sakratarom CK BRSM, padčas žyvoj linii ŭ redakcyi haziety «Biełaruskaja niva» jon pieraličyŭ akcyi BRSM, u tym liku i «Za Biełaruś, lubimuju, kvitniejučuju!», paraiŭ «Maładomu frontu» prajavić i siabie. «Ci heta nie kankretnyja spravy? Voś dzie niachaj prajavić siabie «Małady front»: i ŭ ahraharadkach, i na budoŭli fiermaŭ, abjektaŭ sielskahaspadarčaha pryznačeńnia — voś tam niachaj i asvojvajuć zachodnija hrošy».
Mahčymaj pryčynaj aryštu Kavalova nazyvajecca jaho kamiercyjnaja dziejnaść na vysokaj pasadzie.