Pra «čornyja śpisy» muzykaŭ nie čuli 80% apytanych
Ci viedajuć biełarusy pra svaju kulturu?
Novaje daśledavańnie, praviedzienaha hramadskaj kampanijaj «Budźma biełarusami!» i łabaratoryjaj «Novak» uviesnu 2012 hoda pryśviečanaja pytańniam papularnaści kulturnych mierapryjemstvaŭ.
Za apošni hod 62% biełarusaŭ nivodnaha razu nie byli navat u kinateatry,74% nie naviedali nivodnaj vystavy, 69% nie schadzili ŭ teatr i 59% nie byli na kancercie.
Bolš za 50% nasielnictva našaj krainy za hod nie naviedali naohuł nivodnaha kulturnaha mierapryjemstva.
Pry hetym na prośbu nazvać samaje jarkaje kulturnaje mierapryjemstva, jakoje jany naviedali, 64% darosłych biełarusaŭ nie znajšli što adkazać. Druhim pa papularnaści staŭ adkaz «kancerty» (9,0%), dalej iduć «Dažynki» (3,8%), zamykaje hetuju trojku adkaz «teatr» (3,3%).
Čym vyklikanaje takoje biazradasnaje stanovišča z naviedvańniem kulturnych mierapryjemstvaŭ i ich acenkaj? Na prośbu nazvać pryčyny, ź jakich jany nie naviedvajuć teatraŭ, halerejaŭ, vystavaŭ i h.d., 30% apytanych spasłalisia na toje, što ŭ ich nie chapaje hrošaj, 36% skazali, što nie majuć dastatkova času, a 9,0% paviedamili, što kulturnyja mierapryjemstvy nie vyklikajuć nijakaj cikavaści.
Adnak pry ŭsim hetym, kali respandentam zadali pytańnie «U jakich hramadskich akcyjach vy b chacieli ŭziać udzieł?» bolšaść respandentaŭ (43%) adkazali «kulturnych». Za hetym adkazam ź vialikim adryvam iduć mierapryjemstvy «pa abaronie pravoŭ spažyŭcoŭ» (21%) i «sacyjalnyja» (19,5).
Na pytańnie «U jakich mierapryjemstvach vy chacieli b brać udzieł i ci chacieli b, kab ich było bolš?» 54% nazvali kancerty, 35% — fiestyvali, a 27,5% — filmy pra historyju krainy.
Pra znakamityja «čornyja śpisy» vystupoŭcaŭ, jakich aficyjna nie isnuje, čuŭ tolki 21% biełarusaŭ, astatnija znachodziacca ŭ niaviedańni.
Adnosna papularyzacyi biełaruskaj kultury tolki 17,6% biełarusaŭ ličać, što dziaržava robić dastatkova ŭ hetaj halinie, 39,2% ličać, što chutčej dastatkova, 26,4% — chutčej niedastatkova i 7,4% — zusim niedastatkova.
Lavona Volskaha viedaje amal 23% biełarusaŭ, Uładzimira Puhača — 15%, Źmitra Vajciuškieviča — 10,4%.Siarod hurtoŭ najbolš viadomyja «Lapis Trubiackoj» — 68%, J: Mors — 45% i «Krambambula» — 37%, «Bieź bileta» — 31,5%. Ryhora Baradulina viedaje 63% biełarusaŭ, Niła Hileviča — 60%, a Uładzimira Niaklajeva — 45,5%.