Čyž i Burakoŭski abjadnali svaje akonnyja biznesy

U vyniku ŭhody, zaklučanaj u pačatku lipienia, u jakoj uziali ŭdzieł «Trajpł-techna» i «Minskija vokny», na biełaruskim rynku źjaviŭsia najbujniejšy vytvorca akonnych sistem z PVCH i aluminiju — kampanija «Minski dom voknaŭ».

U kampanii ŭ kamientary ej.by nie chavali mety stvareńnia sumiesnaha biznesu — paciaśnić kankurentaŭ i zaniać hałoŭnyja pazicyi na rynku. Taksama ŭ «Minskim domie voknaŭ» raskazali, što novaja kampanija stvoranaja na parytetnych pačatkach: 50% u joj atrymali ŭładalniki pradpryjemstva «Trajpł-techna», jakoje spyniła dziejnaść, i 50% — uładalnik byłych «Minskich voknaŭ» Ivan Burakoŭski.

«Trajpł-techna» — adzin z najstarejšych biznesaŭ, zasnavanych chołdynham Juryja Čyža «Trajpł» i dźviuma fizičnymi asobami ź Biełarusi i Rasii. Z hetaha biznesu hałoŭny aliharch Biełarusi startavaŭ u pačatku svajoj karjery.

Kampanija pačała dziejnaść u 1994 hodzie, vykarystoŭvajučy profili adnaho z najbujniejšych jeŭrapiejskich vytvorcaŭ — niamieckaj firmy Rehau. Ź ciaham času napramki dziejnaści hetaha biznesu razraślisia. «Trajpł-techna» vyrablaje i mantuje raznastajnyja sistemnyja kanstrukcyi z aluminiju i PVCH-profilaŭ (vokny, dźviery, ofisnyja i bankaŭskija pieraharodki i h.d.), a taksama vyrablaje modulnyja budynki z sendvič-panelaŭ i škłopakiety. Pradukcyja firmy vykarystoŭvałasia na mnohich značnych budoŭlach Biełarusi: u ladovych pałacach u Minsku, Viciebsku, Homieli, Mahilovie, Žłobinie, čyhunačnych i aŭtobusnych vakzałach u Minsku, Nacyjanalnaj biblijatecy). I ŭ cełym dziaržaŭny i karparatyŭny siektar źjaŭlajecca dla «Trajpł-techna» vyznačalnym.

Ivan Burakoŭski, jaki ŭvachodzić u top-100 samych paśpiachovych i ŭpłyvovych biznesoŭcaŭ Biełarusi, svoj akonny biznes pačynaŭ krychu paźniej — u 1998 hodzie. Jon adkryŭ vytvorčaść pad Minskam roznych kanstrukcyj z profilu PVCH i aluminiju pad brendam «Minskija vokny». Taksama jak i dla «Trajpł-techna», pastaŭščykami materyjałaŭ dla «Minskich voknaŭ» stali niamieckija firmy Rehau i Sshuco.

Ivan Burakoŭski — dastatkova viadomy staličny biznesoviec, jaki pieršapačatkovy kapitał zarabiŭ na zalikovych schiemach. Ciapier jon vałodaje šmatprofilnym chołdynham AP NDI PKD, jaki zajmajecca dystrybucyjaj ałkaholnaj pradukcyi (u tym liku i ŭ roźnicu praź sietku vinnych bucikaŭ «Lejcar»), pastaŭkami budaŭničych i azdobnych materyjałaŭ, mietałaprakatu i mižnarodnymi aŭtapieravozkami i aŭtaservisam. Jamu taksama naležać zavod vinahradnych vinaŭ «Piaty kantynient» i pradpryjemstva pa vytvorčaści voknaŭ z dreva «Prafstandart».

Kamientary da artykuła