U Minsku zatrymanaja jašče adna aktyvistka antyjadziernaj kampanii

U Minsku zatrymanaja jašče adna aktyvistka biełaruskaj antyjadziernaj kampanii, staršynia hramadskaha abjadnańnia «Ekadom» Iryna Suchij.

SMS-paviedamleńnie pra svajo zatrymańnie Suchij prysłała žurnalistam, jakija čakali jaje kala budynka rasijskaha pasolstva ŭ Minsku.

Jak paviedamlałasia, siońnia ŭ 12.00 aktyvisty-ekołahi płanavali pieradać u pasolstva RF adkryty zvarot suprać padpisańnia hienieralnaha kantrakta na budaŭnictva biełaruskaj AES.

Za niekalki hadzin tamu ŭ Minsku zatrymali jašče dvuch aktyvistaŭ, kaardynatara kampanii Taćcianu Novikavu i rasijskaha fizika-jadzierščyka Andreja Ažaroŭskaha. Razam ź Irynaj Suchij jany mieli namier naviedać pasolstva. Paśla infarmacyi pra ich zatrymańnie Suchij vyrašyła adpravić zvarot u pasolstva pa faksie, a zatym — padyści da rasijskaha dyppradstaŭnictva, kab dać kamientar žurnalistam, ale taksama była zatrymanaja.

Padrabiaznaści zatrymańnia nieviadomyja. Pakul jość infarmacyja tolki ab tym, što Novikava i Ažaroŭski znachodziacca ŭ Leninskim RUUS.

Nie vyklučana, što zatrymanym inkryminujuć arhanizacyju niesankcyjanavanaj akcyi, jakuju praviała napiaredadni na miescy budučaj biełaruskaj AES hrupa maładych ludziej. Udzielniki ŭčarašniaj akcyi razharnuli transparanty sa słovami «Kryjem matam vaš Rasatam» i «Nas nie spytali!». Na fonie infarmacyjnaha stenda i zbudavańniaŭ infrastruktury biełaruskaj AES źjaviłasia simvaličnaja jadziernaja Śmierć z rydloŭkaj i płakatam «Budujecie AES? Tady ja idu da Vas».

Treba adznačyć, što niezadoŭha da pryznačanaha času pieradačy ŭ pasolstva RF adkrytaha zvarotu kala budynka dyppradstaŭnictva dziažuryli supracoŭniki śpiecsłužb u cyvilnym.

Kamientary da artykuła