Śviatkavańnie Dnia voli ŭ Mahilovie zaciahnułasia na tydzień
2 krasavika sud Leninskaha rajonu razhledziŭ spravu apošniaha z zatrymanych napiaredadni 25 sakavika, moładzievaha aktyvista Jaŭhiena Suvorava, jaki dvoje sutak pravioŭ u izalatary časovaha ŭtrymańnia.
Hod tamu, padčas sakavickich padziejaŭ u Miensku, Ja. Suvorava adpravili ŭ Mahiloŭski śledčy izalatar, dzie pravioŭ bolš za miesiac pa nadumanym abvinavačvańni va ŭchileńni ad słužby ŭ vojsku. Na toj momant specsłužby ličyli, što chłopiec źjaŭlajecca kaardynataram ruchu ZUBR dyj rychtuje ludziej da pajezdki ŭ Miensk. Infarmacyja pra hramadzkuju aktyŭnaść moładzievaha lidera ahučanaja i hetym razam. Ja. Suvoraŭ nie chavaŭ palityčnaj matyvacyi spravy.
Tym nie mienš, chłopca abvinavacili ŭ parušeńni artykuła 17.1 Administracyjnaha kodeksu — drobnaje chulihanstva. Milicyjanty śćviardžali, što Suvoraŭ u niećviarozym stanie «kryčaŭ, razmachvaŭ rukami i macierna łajaŭsia».
Cikava, što ŭ sudzie nie paćvierdziłasia i pałova z taho, što było ŭ rapartach. Tak, dakazana, što Suvoraŭ byŭ ćviarozy, a što jon vykrykvaŭ, nivodny sa śviedkaŭ nia moh patłumačyć. Tamu prysud vyklikaŭ cełuju chvalu śmiechu ŭ sudovaj zali: paśla 40‑chvilinnaha pierapynku sudździa Taciana Rubis abvieściła pra 7 sutak aryštu.
Sud staŭsia dakładnaj kopijaj taho, što prysutnyja pabačyli litaralna tryma hadzinami raniej. Dakładna taki ž sami prysud pry takich ža samych abstavinach atrymaŭ jašče adzin moładzievy aktyvist Anton Uścimčuk. Mahiloŭskija pravaabaroncy znoŭku zahavaryli pra «palityčny kanvejer».