Siarhiej Dubaviec: Adkul prylacieli šviedskija miadźviedziki?

Moža być, zamoŭcam byŭ sam Łukašenka?

U hetaj historyi pytańniaŭ bolš čym adkazaŭ. Pryčym vyrazna artykulavanaha adkazu niama na hałoŭnaje pytańnie: ci byŭ toj švedzki samalot? Adny namioki. Choć aryšty i adstaŭki, viadoma, realnyja.

Ja dumaju, kali b švedzkija fihuranty spravy byli pravaabaroncami, jany nikoli b nie pajšli na takuju avanturu. Pa-pieršaje, heta kryminalnaje złačynstva, nie adekvatnaje nijakim pravaabarončym metam. Pa-druhoje, heta realnaja ryzyka dla žyćcia (pryhadajcie amerykanski pavietrany šar u 1995-m). Kolki kaštuje čałaviečaje žyćcio ŭ Švecyi (strachoŭka), taksama varta ŭličvać. Nu i hrošy na samu akcyju, vidavočna, niemałyja.

Zrešty, što ja davodžu? My ž viedajem, što zładziła «desant» švedzkaje pijar-ahienctva, reklamnaja kampanija, arhanizacyja, pavodle sutnaści svajoj supraćlehłaja ŭsialakamu pravaabarončamu duchu, bo ŭsio kuplajecca i pradajecca, a pierad usim — vyhadny kantrakt (uspomnicie łorda Beła). I tamu darečy pytańnie: chto zamoviŭ švedam «dziorzki palot»? Jasna, što nia švedy i nia niechta z Eŭropy, bo jaki tut ich intares? Dyskredytacyja Łukašenki? Ale kolki toj dyskredytacyi. Razmach na rubiel, a ŭdar navat nie na kapiejku.

Moža być, zamoŭcam byŭ sam Łukašenka? Švedzki palot adbyŭsia na nastupny dzień paśla taho, jak usie ŚMI šumna zahavaryli pra skandał z admovaju Łukašenku ŭ vizie na Alimpijadu. Miadźviedziki i sapraŭdy zatulili saboju niepryjemnuju temu.

Švedy prylacieli nibyta ź Litvy, pavietranuju miažu jakoj achoŭvaje avijacyja NATA. Heta značyć, pa vialikim rachunku, adbyłasia pravakacyja NATA suprać Rasiei, ź jakoj u Biełarusi nibyta ahulnaja pavietranaja miaža. Zhadziciesia, nie Łukašenkaŭ heta ŭzrovień.

I potym, kali b Łukašenka heta prydumaŭ, navošta jamu amal miesiac čakać, nie pryznavać faktaŭ i nie reahavać? Jon i prareahavaŭ, jak moh na svaim uzroŭni — aryštavaŭ studenta i ryełtara, bo niekaha ž treba było aryštavać. Zdymać hienerałaŭ nie rašaŭsia, bo nie razumieŭ, što heta ŭsio značyć. Paśla, dumaju, jamu padkazali, kaho zdymać.

Takim čynam, zastajecca adzin bok, kamu heta moža być vyhadna. Našy staryja znajomyja kramloŭskija lalkavody. Hrošaj u ich biaź miery, tyražavać pa susiedniaj krainie antydyktatarskija ŭlotki — adna pryjemnaść, nu i realny intares — pravieści čarhovuju karekcyju kiroŭnych kadraŭ u Biełarusi, pastavić svaich ludziej tudy, dzie apynulisia nie zusim, tak by mović, svaje.

Na miesca adzinaha, musić, biełaruskamoŭnaha šefa-siłavika (vystupaŭ u pałacie pradstaŭnikoŭ pa-biełarusku), a da taho ž uradženca Biełarusi, pryjšoŭ čarhovy «varah», čałaviek niadkul, dakładniej, z Akademii Hienštabu RF…

Možna było b nie źviarnuć uvahi na hetuju biełaruskamoŭnaść, u nas u palitycy zvyčajna heta arhumentam nia ličycca. Možna było b, kali b 31 lipienia ŭ «Sovietskoj Biełoruśsii» nia vyjšaŭ artykuł z paprokam švedzkamu pasłu Eryksanu jak by za miadźviedzikaŭ — u kantekście, a ŭ tekście — za jahonuju biełaruskamoŭnaść.

U mejnstrymie siońniašniaha biesprecedentnaha ažyŭleńnia biełarusajedaŭ i rusifikataraŭ pa linii Maskva-Miensk biełaruskamoŭnaść robicca realnym faktaram baraćby suprać uciahvańnia našaj krainy ŭ sferu ŭsio bolšaha kramloŭskaha ŭpłyvu.

Eryksana, darečy, «źniali» na druhi dzień paśla zhadanaha artykułu ŭ «SB».

Ciapier hladzim na vyniki miadźviedžaha desantu dla Biełarusi. Biełaruś straciła apošniaha biełaruskamoŭnaha siłavika i apošniaha realna biełaruskamoŭnaha zamiežnaha pasła. Na ŭzroŭni ŭłady i dyplamatyi my ŭžo mała čym adroźnivajemsia ad Sarataŭskaj vobłaści, zastałosia tolki ŭzrovień pasadaŭ apuścić.

Usio novyja «niezrazumiełyja» padziei i zdareńni — usiaho tolki praciah symbaličnych, na pieršy pohlad, akcyjaŭ, jakija tłumačać «palityku partyi»: aformleny całkam pa-rasiejsku novy mienski aŭtavakzał, zakryćcio jašče sta biełaruskich škoł z novaha navučalnaha hodu, biaskoncyja aryšty za movu jak za łajanku i, narešcie, vianok ad «biełaruskaha» prezydenta biełaruskamu paetu Janku Kupału — pa-rasiejsku.

Čaho vam chočacca, panovie?

Jaki vas vyklikaŭ prymus

Zabić tryvohu ab tej movie,

Jakoj azvaŭsia biełarus?

A tut jašče na BT Alimpijadu zabaranili kamentavać pa-biełarusku…

Kamientary da artykuła