Zmahańnie za virtualnuju Biełaruś
Anłajn-hulnia eRepublik — jak pravieści biełarusizacyju i viarnuć Viciebščyny, jakaja apynułasia pad akupacyjaj Litvy.
Paru dzion tamu na rachunak uKantakcie ja atrymaŭ paviedamleńnie ad nieznajomaha čałavieka, jakoje pačynałasia słovami:
«Ty čuŭ pra hulniu eRepublik? Heta hulnia źjaŭlajecca symulataram žyćcia dziaržavy, dzie vam daviadziecca hulać za hramadzianina adnoj z krainaŭ <.> Na žal,
na dadzieny momant ułada ŭ Biełarusi naležyć rasiejcam dy ich prychilnikam, adnak siły biełaruskaj apazycyi mocnyja jak nikoli, i nievialikaja kolkaść navičkoŭ-biełarusaŭ daść pieravahu našamu boku! My čakajem ciabie ŭ hulni! Žyvie Biełaruś!»
Pierachodžu pa spasyłcy. Prapanujuć zarehistravacca i vybrać hramadzianstva. Vybiraju Biełaruś.
Kali ŭ realnaj Biełarusi — leta i palityčnaja apatyja, to žyćcio ŭ virtualnym śviecie kudy bolš nasyčanaje.
Na forumie znachodžu niekalki spasyłak, dapamožnik pa hulni, a taksama videaroliki.
Z kantekstu dyskusijaŭ na forumie daviedvajusia niekalki uzrušalnych navinaŭ.
Pa-pieršaje, Viciebskaja vobłaść daŭno akupavanaja litoŭcami, a dakładniej sučasnaje kiraŭnictva Biełarusi zdaje vobłaść u arendu za peŭnuju kolkaść zołata.Pa-druhoje, Biełaruś znachodzicca ŭ ščylnym sajuzie z Rasiejaj i ŭ kanflikcie z cyvilizavanaj častkaj Eŭropy. A pa-treciaje, prezydentam krainy nibyta źjaŭlajecca rasiejec prałukašenkaŭskich pohladaŭ.
Prapanujuć dałučycca da partyi. Kožnaja maje svaju symboliku, deputataŭ u virtualnym biełaruskim parlamencie. A jakija krasamoŭnyja nazvy! «Nacyjanalny Front», «Niezaležnaja Biełaruś», «Narodnaja Hramada». A jašče jość Partyja ahraryjaŭ i navat Partyja kryžakoŭ. Balšynia, vidavočna, daŭno vyrakłasia svajoj pieršapačatkovaj idealohii. Tak,
na apošnich prezydenckich vybarach z 45% hałasoŭ pieramoh prarasiejski kandydat simust2, jakoha padtrymali partyi «Niezaležnaja Biełaruś» i «Freedom Belarus».
«My ich nazyvajem „čyrvona-zialony lahier“ — patłumačyŭ mnie Jan, staršynia partyi «Nacyjanalny Front», — Prezydent — rasiejec ŭ realnym žyćci».
U virtualnaj Biełarusi vydajucca kala 15 hazetaŭ, kožnaja ź jakich maje svaich padpiščykaŭ. Ź ich samyja papularnyja rasiejskamoŭnaja «Our Country Times», biełaruskamoŭnaja «Narodnaja Vola» i try anhłamoŭnyja, jakija daŭno nie drukavalisia, a ich redaktary, vidavočna, pierastali hulać.
Pytajusia Jana (Hyena Black), navošta ludzi hulajuć u takija hulni.
«Razumieješ, u hulni možna atrymać toje, čaho nie chapaje ŭ realnym žyćci. Svaboda, demakratyja, mahčymaść biaz žachu vykazvać svajo mierkavańnie», — piša Jan.
Jan — biełarus, jaki daŭno žyvie ŭ Izraili, pracuje, słužyć u armii, a ŭ volny čas — kiruje biełaruskaj partyjaj, chaj sabie i virtualnaj.
Hałoŭnaja meta ŭ hulni — raźvivać svaje navyki, handlavać ź inšymi hulcami, zarablać hrošy na zbroju i ježu, vajavać.
«Ja, kali pačaŭ hulać, uvohule paličyŭ hulniu sucelnaj błytaninaj, a nasamreč usio ścipła i zrazumieła, jak u biełaruskaj chacie» — napisaŭ mnie Ivan Daškoŭ (jon ža Artyks), kandydat na prezydenta, a ŭ realnym žyćci — kieramist ź Miensku. I dadaŭ:
«Zaraz paŭstańnie ŭ Viciebsku, kali maješ bazuki i skarystaješ ich tam, jość šaniec uziać bch medal».
Bazuki ŭ mianie nie akazałasia, tolki niekalki tankaŭ. Ja pierajechaŭ u Viciebskuju vobłaść, na terytoryju Litvy, i dałučyŭsia da partyzanskaha ruchu supracivu.
U hety čas u Homieli — stalicy virtualnaj Biełarusi — išli ažyŭlenyja debaty. 5 žniŭnia, u niadzielu — čarhovyja prezydenckija vybary. Vyłučycca ŭ prezydenty moža kožny. Prezydent vystupaje ad imia krainy, źbiraje padatki, vydaje zakony, rasparadžajecca terytoryjami i resursami.
Na forumie usurjoz razharełasia dyskusija, jak budučy prezydent pavinien stavicca da Rasiei i rasiejcaŭ.
«Jak ty ličyš, razvodzić antyrasiejskuju palityku? Jak pa mnie, biez padstavy, heta hłupstva. Ja liču čto heta dziacinstva — nie lubić rasiejcaŭ za toje, što jany rasiejcy» — piša Artyks. Inšyja siabry partyi pahadžajucca, što nie lubić rasiejcaŭ za toje, što jany rasiejcy, — hłupstva.
Na sajcie źjavilisia prahramy niekatorych kandydataŭ.
— A ci nielha sfalšavać vybary? — pytajusia ja ŭ Jana
— Sfalšavać nielha. Niekatoryja sprabujuć stvaryć «botaŭ», ale ich «banić» administracyja.
— Jakaja ciapier palityka biełaruskich uładaŭ, i čamu ty ličyš, hetuju ŭładu treba mianiać?
— Našaja ŭłada viadzie prarasiejskuju palityku. Takoje pačućcio, što naša kraina — maryjanetka Rasiei.
Niadaŭna pačałasia vajna pamiž Ukrainaj i Rasijaj. Jasna kaho padtrymaŭ «čyrvona-zialony lahier».
— A ź jakimi krainami ŭ śviecie supracoŭničaje virtualnaja Biełaruś?
— My siabrujem z takimi krainami jak Charvatyja, Irlandyja, Ukraina, Hiermanija, Arhientyna, Partuhalija… U nas doŭhi čas byŭ vajenny kanflikt z sajuzam ABC (Aljans Bałtyjskich Krainaŭ-Litva, Łatvija i Estonija).
Litvie byli patrebnyja našyja rehijony dla palapšeńnia ekanomiki. Pakolki my značna słabiejšyja za ich u vajennym planie (150 bajcoŭ u nas, 600 bajcoŭ — u Litvy) my pahadzilisia na kampramis — arenda Viciebska.
— Padzialisia planami na novuju ŭładu? Jakija hałoŭnyja punkty prahramy?
— My źbirajemsia viarnuć ŭładu ŭ krainie biełarusam. Vykarystańnie biełaruskaj movy na dziaržaŭnym uzroŭni, admova ad ślapoj prarasiejskaj palityki, palapšeńnie adnosinaŭ ź inšymi susiedziami. Moc krainy zaležyć ad kolkaści hulcoŭ. Biełaruś ciapier adna z samych słabych krainaŭ u hulni.
Za Biełaruś hulaje 614 čałaviek, jašče troje (serb, arhientyniec i albaniec) stajać u čarzie pa biełaruskaje hramadzianstva. Albaniec śćviardžaje, što nasamreč jon biełarus, prosta pamyłkova vybraŭ krainu. Za roznyja dziaržavy śvietu — 233 tysiačy aktyŭnych hulcoŭ.
Taki voś śviet virtualnaj Biełarusi — dziŭny i žorstki. Uvohule, hulnia dazvalaje zmadelavać samyja niečakanyja pavaroty u suśvietnaj historyi. Balšynia hulcoŭ vybirajuć svaje ŭłasnyja krainy, kanflikty z realnaha žyćcia znachodziać svajo adlustravańnie i ŭ internecie.
Jašče adzin hulec LibertIN mnie vysłaŭ spasyłki pra historyju. Jak vyśvietliłasia, u hulni jość svaje hieroi i lehiendy.
Uvohule, Biełaruś stała niezaležnaj nie adrazu. Da hetaha biełarusy hulali za Paŭnočnuju Kareju i Rasieju.
Polšča, doŭha nia dumajučy, zładziła ŭ Biełarusi pieravarot, a potym jašče adzin. Asnoŭny arhument palakaŭ, što ŭ Biełarusi mała ŭ kaho jość dostup da internetu. Zaverbavali miascovych, maŭlaŭ, dapamažycie Polščy ŭ vajnie z Rasiejaj. Druhi pieravarot byŭ zrobleny pad soŭsam «vyciahnuć Biełaruś z rasiejskaj sfery ŭpłyvu».
«Paśla ŭviadzieńnia Biełarusi ŭ hulniu, tudy pačali źjaždžacca mnostva hulcoŭ z roznych krainaŭ, jakija pieraśledvali roznyja mety. Adny chacieli razbahacieć za košt kazny (heta palaki, rumyny). Inšyja chacieli dapamahčy jeBiełarusi ŭstać na nohi (heta, viadoma, biełarusy, ukraincy, ruskija)».
eRepublik — heta stratehičnaja onłajn-hulnia z elementami sacyjalnaj sietki. Ja by skazaŭ, heta sublimacyja sacyjalnaj aktyŭnaści. Asabliva dla biełarusaŭ, pazbaŭlenych mahčymaści ŭdzielničać ŭ palityčnych pracesach u realnym žyćci.