Prynada preferencyjaŭ na metalovym kručku demakratyzacyi
Palityčnyja padteksty
Zaściaroha abvalić systemu pieravažvaje spakusu atrymać kredyty, investycyi dy mahčymaść špacyravać pa bruku stalicaŭ Staroha Śvietu. Piša ŭ svaim błohu Alaksandar Kłaskoŭski.
Blok vykazvańniaŭ aficyjnaha kiraŭnika pra stasunki z Eŭraźviazam najbolej blizka da aryhinału padaŭ učora, badaj, "Interfaks". BIEŁTA, a tym bolej viečarovaja "Panarama", prapanavali bolej pryčasany (dakładniej, koratka padstryžany:) varyjant. Biez "baranoŭ".
Zrešty, sutnaść nie źmianiajecca. Na sastupki ŭ halinie demakratyzacyi i pravoŭ čałavieka (na jakich jany tam "zacyklilisia") Miensk iści kateharyčna nia choča. Zaściaroha abvalić systemu pieravažvaje spakusu atrymać kredyty, investycyi dy mahčymaść špacyravać pa bruku stalicaŭ Staroha Śvietu.
Naadvarot, zaraz kivač pajšoŭ u bok Maskvy. Učora aficyjny kiraŭnik čarhovy raz zajaviŭ, što treba sustrecca z Pucinym. Zaraz nahodaj stała pytańnie pra amerykanskija supraćrakiety.
Pucin adhukacca nie śpiašajecca. Uvohule ž Kreml usio hłybiej akunajecca ŭ svaje pieradvybarčyja kłopaty. Što da biełaruskaha kiraŭnictva, to kramloŭcy zaraz mohuć abmiežavacca zadačaj źvieści na nul jahonyja mahčymaści zhulać na rasiejskim elektaralnym poli.
Voś charakternaje vykazvańnie (hł. u hetym vialikim tekście adkaz №17) kramloŭskaha palittechnolaha Hleba Paŭłoŭskaha datyčna "biełaruskaha pytańnia": "Luby režym technična možna skinuć. U hetym niama nijakaj asablivaj zasłuhi. Jak praviła, heta jość sposabam nabyć dla siabie dadatkovyja prablemy za ŭłasny košt. Biełaruskuju palityku musiać apłočvać hramadzianie Biełarusi".
Całkam prahmatyčny pohlad z maskoŭskaje zvanicy. Darečy, u sp.Paŭłoŭskaha jość i asabisty nia nadta ŭdały dośvied hulni na ŭkrainskim palityčnym poli ŭ pamarančavy peryjad. Jak bačym, tyja hulni za kamandu Janukoviča adhukajucca i pa siońnia.
Uvohule ž dla rasiejskich palityčnych elitaŭ idefiksam jość stabilnaść pa perymetry miežaŭ. Tak što i ŭ "biełaruskim pytańni" rezkija ruchi Kramla najbližejšym časam małaimaviernyja, kolki b ni paŭźli čutki, što "tam užo ŭsio vyrašyli"...
Nu a Eŭropa... Eŭropa sa svaimi 12 umovami pakul što moža adpačyvać. Nie patrebny tutejšamu načalstvu hety trajanski koń. Na prynadu preferencyjaŭ Miensk vieścisia nia choča, bo jana nasadžanaja na metalovy kručok demakratyzacyi. Tak što maje racyju Hleb Paŭłoŭski: biełarusy sami apłociać palityku svajho kiraŭnictva pa ŭsich azimutach.