Pastku dla sacyjolahaŭ prybrali z vačej
Padvodnyja płyni biełaruskaj palityki
Choć toj dyjaloh z Zachadam idzie jak mokraje haryć, ale ž niejki voŭk u lesie zdoch:) Piša ŭ svaim błohu Alaksandar Kłaskoŭski.
Pry ŭsioj bravadzie ŭładam nie zusim abyjakava, što padumaje Eŭropa. Voś dva štrychi apošnich dzion.
Pa-pieršaje — voŭk u lesie zdoch! — pradstaŭnikoŭ Biełaruskaj asacyjacyi žurnalistaŭ zaprasili ŭdzielničać u abmierkavańni zakonaprajektu, jaki zakranaje medyjnyja pytańni.
Havorka idzie pra našumieły zakon ab infarmacyi, jaki dasiul, adnak, zastavaŭsia dla žurnalisckaj supolnaści rečču ŭ sabie. Pieršaje znajomstva admysłoŭcaŭ BAŽu z prajektam pakazvaje, darečy, što zaściarohi prahresiŭnaje hramadzkaści (u tym liku i vašaha pakorlivaha słuhi:) byli nie takimi ŭžo biespadstaŭnymi.
Nie pieraličyć raniejšych marnych zvarotaŭ BAŽu da ŭładaŭ u pytańniach abarony prava hramadzianaŭ na infarmacyju. Ale, bač, kropla kamień točyć. Asabliva kali na hety kamień adnačasna pačynajuć cisnuć i z uschodu, i z zachadu.
Nu i druhoje: pavodle źviestak "BiełPartyzana", z Pałaty ciškom adklikali taksama našumieły prajekt ab apytańniach hramadzkaj dumki, jaki moh prydušyć reštki niezaležnaj sacyjalohii. I adsiek by ŭ presy mahčymaść karystacca źviestkami sacyjalahičnych słužbaŭ, što nie atrymali akredytacyi ŭ adpaviednaj kamisii. Suprać čaho taksama nie adnojčy, pryčym nia ŭtojvajučy prafesijnaj zacikaŭlenaści, pratestavaŭ aŭtar hetych radkoŭ.
Zrazumieła, tut najpierš spracavali značna bolej mahutnyja čyńniki, čym jak kvołyja pratesty ajčynnaj hramadzkaści. Ale ž fakt toje, što i nibyta marny lamant u pustelni pry źbiehu akaličnaściaŭ moža dać rezanans.
Deputatka Volha Abramava miarkuje, što hety prajekt u parlament užo nia vierniecca. Prafesar Manajeŭ, prajšoŭšy praz usie cierni, nie taki aptymistyčny.
Kaniešnie, tut usio jašče mohuć sto razoŭ adkrucić nazad. Jak nia fakt i toje, što ŭ zakonie ab infarmacyi ŭličać prapanovy BAŽu. Ale tak ci inačaj — prypavieść pra dźviuch žabaŭ u śmiatanie davodzić svaju aktualnaść. Varta, varta dryhać kancavinami! :)