Chronika represij i zatrymańniaŭ za 29 sakavika — 3 krasavika
Nadrukavana ŭ № 12'2007
29 sakavika
Hareckaha vazili na dopyt
Padčas znachodžańnia na Akreścina, Barysa Hareckaha vazili na dopyt u prakuraturu, dzie jamu vystavili abvinavačvańnie pa kryminalnym artykule za ŭdzieł u niezarehistravanaj arhanizacyi «Małady front». Barys Harecki, zatrymany 22 sakavika i asudžany na 12 sutak aryštu, trymaŭ u turmie haładoŭku pratestu.
30 sakavika
Płacicie za achovu Kurapataŭ!
Arhkamitetu dziela ŭšanavańnia pamiaci achviaraŭ stalinskich represijaŭ źviarnuŭsia da staršyni Mienharvykankamu Michaiła Paŭłava, vykazaŭšy zakłapočanaść stanam Kurapataŭ i vypadkami vandalizmu ŭ dačynieńni da «łavy Klintana». Namieśnik staršyni abłasnoj milicyi sp.Šutaŭ adkazaŭ, što UUS Mienabłvykankamu nia maje nieabchodnych finansaŭ, i «zabiaśpiečyć kruhłasutačnuju achovu kompleksu Kurapaty na biazvypłatnaj asnovie nia maje mahčymaści».
Pieratrus u domie frontaŭca
Da siabra Sojmu Partyi BNF Uładzimiera Kiškurny źjavilisia čaćviora milicyjantaŭ z paniatymi i orderam na pieratrus na padstavie pošuku narkotykaŭ. Pieratrus skončyŭsia kanfiskacyjaj ryzohrafa, razaka dla papiery i 20 ŭlotak «Za Svabodu!».
Na Kazulina cisk
Pavodle słovaŭ advakata Ihara Rynkieviča, administracyja kalonii akazvaje psychalahičny cisk na A.Kazulina. Źniavolenym zabaroniena kantaktavać ź im. Parušalnikaŭ pieravodziać u inšyja kalonii.
Medyki pryznalisia
Zahadčyca vośmym adździaleńniem psychijatryčnaj kliniki, dzie try dni znachodziłasia Kryścina Šacikava, paviedamiła, što apazycyjanerku dastavili ŭ kliniku milicyjanty z nakirunkam na prymusovuju špitalizacyju.
1 krasavika
Zatrymanaja dačka Šandaroviča
1 krasavika viečaram u padziemnym pierachodzie na płoščy Jakuba Kołasa milicyjanty zatrymali Kryścinu Šacikavu, pradstaŭnika Biełaruskaha Chelsynskaha kamitetu Andreja Kima i hramadzianku Rasiei, dačku Viktara Šandaroviča — Valancinu Čubaravu. Ich źvinavacili ŭ rasklejvańni nalepak, dzie źmiaščałasia vinšavańnie z Dniom Durnia. Zatrymanych dastavili ŭ UUS Savieckaha rajonu i adpuścili.
Napad na homielski ofis BNF
Kala 22‑j nieviadomyja napali na ofis Homielskaj arhanizacyi Partyi BNF, što ŭ pryvatnym domie jaje staršyni Anatola Papłaŭnoha. Chulihany vyrvali fortku na kuchni, raskidali kvietkavyja vazony i zrujnavali altanku.
2 krasavika
Daškieviča pieraviali na tartak
Palitviazień Źmicier Daškievič pieraviedzieny ŭ druhi atrad i nakiravany pracavać na lesapilny ŭčastak. Pra heta baćki aktyvista daviedalisia ź jaho listoŭ. Na lidera «Maładoha frontu» ŭžo nakłali čatyry dyscyplinarnyja pakarańni, što źmienšyła jahonyja šancy na daterminovaje vyzvaleńnie praz amnistyju.
Pravaabaroncaŭ vysialajuć
Mahiloŭski pravaabarončy centar dy miascovaja filija BCHK atrymali ad upravy majomaści harvykankamu prapanovu skasavać damovu na arendu pamiaškańnia. Matyvacyja — arhanizacyi parušyli ŭmovy arendy. Zhodna z paviedamleńniem, subarandatar ofisu — dabračynnaje hramadzkaje abjadnańnie «Vodhuk» — zajmaje pamiaškańnie biez adpaviednaha dakumentalnaha rašeńnia ŭpravy majomaści j ŽEU №20. Pravaabaroncy kažuć pra biespadstaŭnaść pretenzijaŭ.
Tydzień tamu biaz ofisu zastałasia miascovaja filija Partyi BNF. Uprava justycyi admoviłasia padoŭžyć damovu na arendu.
Čarhovaja sprava proci Klimava
Prakuratura pačała kryminalnuju spravu suprać byłoha deputata Viarchoŭnaha Savietu 13‑ha sklikańnia i pradprymalnika Andreja Klimava za paklop na Alaksandra Łukašenku. Padstavaj stała publikacyja A.Klimava na internet‑sajcie Abjadnanaj hramadzianskaj partyi pad zahałoŭkam «Revolution forever abo Jak pravilna raźbirać cyhanskaha kabana ŭ hod śvińni».
Aktyvista aryštavali na 7 sutak
U sudzie Leninskaha rajonu adbyŭsia razhlad spravy Antona Ŭścimčuka, jakoha preventyŭna zatrymali jašče 24 sakavika dy źmiaścili ŭ izalatar časovaha ŭtrymańnia na dvoje sutak. Chłopcu zakidajuć parušeńnie artykułu 17 č.1 Administracyjnaha kodeksu. Tydzień tamu junak zajaviŭ, što sprava maje palityčny charaktar dyj zapatrabavaŭ advakata, z‑za čaho raźbiralnictva pieranieśli. Ale A.Uścimčuk usio adno atrymaŭ siem sutak aryštu. Z budynku sudu chłopiec adpraviŭsia dachaty, bo nie znajšłosia nivodnaha kanvojnaha. Ciapier chłopiec, jakomu zastajecca adsiadzieć jašče piać sutak, čakaje pozvu jašče raz naviedać mahiloŭski izalatar časovaha ŭtrymańnia.
Jašče adzin prysud u Mahilovie
Adbyŭsia sud nad aktyvistam moładzi BNF Mahilova Jaŭhienam Suvoravym. Chłopiec zatrymany 31 sakavika i abvinavačany ŭ drobnym chulihanstvie. Jaŭhien Suvoraŭ atrymaŭ siem sutak turemnaha źniavoleńnia. Piać sutak adviedziena dla abskardžvańnia prysudu.
3 krasavika
Andreja Klimava aryštavali
Prakuratura Miensku abvinavaciła Andreja Klimava ŭ zaklikach da źviaržeńnia isnujučaha ładu. Andreja Klimava źmiaścili ŭ śledčy izalatar na vuł.Vaładarskaha, dzie jon budzie znachodzicca da sudu.
Klimavu inkryminujecca złačynstva, praduhledžanaje artykułam 361 Kryminalnaha kodeksu «Zakliki da dziejańniaŭ, skiravanych na naniasieńnie škody źniešniaj biaśpiecy Respubliki Biełaruś, jaje suverenitetu, terytaryjalnaj niedatykalnaści, nacyjanalnaj biaśpiecy i abaronazdolnaści». A.Klimaŭ abvinavačvajecca pa č.3 artykułu: «publičnyja zakliki da zachopu dziaržaŭnaj ułady, abo hvałtoŭnaha źmianieńnia kanstytucyjnaha ładu Respubliki Biełaruś, abo zdrady dziaržavie, abo ździajśnieńnia terarystyčnaha aktu abo dyversii, ci ździajśnieńnia inšych dziejańniaŭ, skiravanych na škodu źniešniaj biaśpiecy Respubliki Biełaruś, jaje suverenitetu, terytaryjalnaj niedatykalnaści, nacyjanalnaj biaśpiecy i abaronazdolnaści abo raspaŭsiud materyjałaŭ, jakija ŭtrymlivajuć takija zakliki z vykarystańniem ŚMI». Klimavu pahražaje źniavoleńnie ad dvuch da piaci hadoŭ.
Vyhaniajuć z zaniatkaŭ za nadpis «Za svabodu» na majcy
Dyrektar himnazii №2 h. Barysava Piotar Vaśkoŭski pahražaje nia vydać atestat moładzievamu aktyvistu Maćvieju Bialaju. Aktyvist pryjšoŭ na zaniatki ŭ sakołcy z nadpisam «Za svabodu!». Za heta dyrektar škoły vyhnaŭ jaho z uroku ekanomiki, jaki jon vykładaje. Vaśkoŭski zajaviŭ, što «škoła — ustanova dziaržaŭnaja», a Bialaj «vystupaje suprać dziaržavy». Dyrektar pryhraziŭ, što kali vučań nia zdymie «palityčnuju» bajku, jon vykliča milicyju.