Surapin i Bašarymaŭ vyzvalenyja pad padpisku
+ videa
Surapina advieźli damoŭ u Słuck.
Anton Surapin udoma, z baćkami. Fota Svaboda.org.
Voś što havorycca ŭ paviedamleńni sajta KDB: «Kamitetam dziaržaŭnaj biaśpieki Respubliki Biełaruś praciahvajecca rasśledavańnie kryminalnaj spravy pa fakcie niezakonnaha pierasiačeńnia 4 lipienia h.h. dziaržaŭnaj miažy Respubliki Biełaruś paddanymi Šviecyi na lohkamatornym samalocie.
17.08.2012 hramadzianam Biełarusi Bašarymavu S.A. i Surapinu A.A., abvinavačanym pa č.6. art.16 i č.3. st.371 KK Biełarusi, źmienienaja miera strymańnia z zaklučeńnia pad vartu na padpisku ab niavyjeździe i naležnych pavodzinach.
Bašarymaŭ S.A. i Surapin A.A. zastajucca ŭ statusie abvinavačanych, pakolki nieabchodnyja śledčyja dziejańni, u tym liku praviadzieńnie vočnaj staŭki, nie praviedzienyja ŭ suviazi z admovaj paddanych Šviecyi źjavicca ŭ śledčaje ŭpraŭleńnie. Kančatkovyja pracesualnyja rašeńni ŭ dačynieńni da hramadzian Biełarusi, jakija prachodziać pa kryminalnaj spravie, buduć pryniaty tolki paśla ŭniasieńnia poŭnaj jasnaści ŭ abstaviny rasśledavanaha złačynstva».
Anton Surapin sam patelefanavaŭ pres-słužbie HA «BAŽ» u 20.30 sa Słucku, paviedamlaje sajt arhanizacyi.
Anton telefanavaŭ z numara maci, Aleny Surapinaj. Peŭny čas jon budzie dastupny pa jaje telefonie. Zaŭtra žurnalist płanuje nabyć novy aparat (jaho technika dahetul zastajecca ŭ KDB), numar jakoha paviedamić praz svoj sajt bnp.by, a taksama ŭ supołkach Vkontaktie i Facebook.
Antona vyzvalili kala dźviuch hadzin tamu i pryvieźli na mašynie dachaty ŭ Słuck. Jon pakul nie maje prava vyjazdžać za miežy horada – «chiba što na voziera, na lecišča».
Abmiežavańniaŭ nakont karystańnia internetam u jaho niama – budzie sprabavać vychodzić na suviaź praz stary kampjutar, jaki staić u baćkoŭ.
U vieraśni ŭ jaho skančajucca kanikuły i pačynajecca «žurfakaŭskaja» praktyka. U vieraśni jon płanuje viarnucca ŭ Minsk – kali dazvolać.
Listy ŭ SIZA da jaho dachodzili tolki ad rodnych.
«Toje, što vypuścili ŭ hadavinu majho sajta (mienavita 17 žniŭnia – roŭna hod z dnia źjaŭleńnia pieršaha dopisu na sajcie bnp.by) – najlepšy padarunak dla mianie», – kaža Anton.
Nahadajem, 6 lipienia 2012 hoda byŭ zatrymany i ŭziaty pad vartu ŭ SIZA KDB Siarhiej Bašarymaŭ, a 13 lipienia 2012 hoda — fatohraf Anton Surapin. 16 i 23 lipienia adpaviedna, im było pradjaŭlena abvinavačvańnie pa č. 3 art. 371 Kryminalnaha kodeksa Respubliki Biełaruś «Niezakonnaje pierasiačeńnie dziaržaŭnaj miažy Respubliki Biełaruś». Takim čynam KDB Biełarusi rascaniła raźmiaščeńnie Antonam Surapinym fotazdymkaŭ mierkavanaha palotu šviedskaha samalota ŭ biełaruskaj pavietranaj prastory. Dziŭnymi vyhladajuć i abvinavačvańni na adras Siarhieja Bašarymava, jaki zdavaŭ u arendu kvateru hramadzianam Šviecyi, u spryjańni pierachodu dziaržaŭnaj miažy Respubliki Biełaruś.