Vika Maroz nie padlahaje mižnarodnamu ŭsynaŭleńniu
Zajaviła dyrektar Nacyjanalnaha centru ŭsynaŭleńnia Ministerstva adukacyi Biełarusi.
Vika Maroz nie padlahaje mižnarodnamu ŭsynaŭleńniu. Pra heta 5 krasavika zajaviła dyrektar Nacyjanalnaha centra ŭsynaŭleńnia Ministerstva adukacyi Biełarusi Natalla Paśpiełava na pres‑kanfierencyi ŭ Minsku, adkazvajučy na pytańni žurnalistaŭ.
N.Paśpiełava padkreśliła, što ŭ Haahskaj kanviencyi ab pravach dziciaci, padpisanaj Biełaruśsiu ŭ 2003 hodzie, havorycca ab tym, što «dzicia, intehravanaje ŭ siamju na terytoryi krainy svajho pachodžańnia i hramadzianstva, nie moža być pieradadziena na mižnarodnaje ŭsynaŭleńnie». «Heta norma nie biełaruskaha zakanadaŭstva, a norma mižnarodnaha prava, — skazała N.Paśpiełava. — My ličym, što heta absalutna pravilna. Kali dzicia nakiravana ŭ biełaruskuju siamju, jano abaroniena, jaho intaresy abaronieny. Jon atrymaje mahčymaść siamiejnaha vychavańnia».
N.Paśpiełava zaznačyła, što tearetyčna ŭdačareńnie Viki siamjoj Džusta‑Barnačyn abo inšaj zamiežnaj siamjoj mahčyma ŭ tym vypadku, kali raspadziecca pryjomnaja siamja dziaŭčynki. «Ale ja nie dumaju, što tak zdarycca, — zajaviła dyrektar centra. — Heta prafiesijnyja vychavacieli, jakija pracujuć, jakija zajmajuć pravilnuju pazicyju ŭ adnosinach i da adnaho, i da druhoha dziciaci».
Kamientujučy toj fakt, što da skandała ź siamjoj Džusta‑Barnačyn V.Maroz niekalki hadoŭ była adździelena ad svajho starejšaha brata i žyła ŭ Vilejskaj škole‑internacie, N.Paśpiełava zaznačyła, što «dzicia mieła admietnaści psichafizičnaha raźvićcia» i dziaŭčyncy była nieabchodna dapamoha śpiecyjalistaŭ.
Nahadajem, što ŭ vieraśni 2006 hoda muž i žonka Alasandra Džusta i Maryja‑Kjara Barnačyn, da jakich Vika niekalki hadoŭ pryjazdžała ŭ hości na letnija i kaladnyja kanikuły, admovilisia viartać dziaŭčynku ŭ Biełaruś. Siamiejnaja para śćviardžała, što ŭ internacie dziaŭčynka ciarpieła «fizičnaje i maralnaje nasille». Na praciahu 20 dzion italjanskaja siamja chavała Viku ŭ manastyry na poŭnačy Italii. 27 vieraśnia italjanskaja palicyja znajšła dziaŭčynku, i 30 vieraśnia jana była dastaŭlena śpiecrejsam u Minsk. 30 kastryčnika dziaŭčynku addali ŭ siamju Aleny i Siarhieja Vasileŭskich, dzie ŭžo vychoŭvaŭsia jaje starejšy brat Saša. Pry hetym A.Vasileŭskaja 19 kastryčnika ŭ intervju BiełaPAN zajaviła ab tym, što jaje siamja nie hatova ŭziać da siabie dziaŭčynku.
Biełaruskija čynoŭniki nieadnojčy zajaŭlali, što siamja Džusta‑Barnačyn nikoli nie źviartałsia z prośbaj ab udačareńni Viki. U toj ža čas A.Džusta ŭ intervju BiełaPAN 22 śniežnia zajaviŭ, što dakumienty dla ŭdačareńnia Viki ŭžo hod znachodziacca ŭ italjanskaj arhanizacyi, jakaja zajmajecca mižnarodnym usynaŭleńniem, ale biełaruskaje pasolstva ŭ Italii ich nie prymaje.
2 sakavika biełaruski pasoł u Italii Alaksiej Skrypko patłumačyŭ, što pasolstva prypyniła pryjom dakumientaŭ u 2004 hodzie ŭ suviazi sa źmianieńniem pracedury mižnarodnaha ŭsynaŭleńnia.