Śpiecsłužby błakujuć telefony Natalli Radzinaj
Na mabilnyja telefony hałoŭnaha redaktara sajta charter97.org biaskonca pastupajuć zvanki. Praz heta karystacca telefonami niemahčyma.
Charakterna, što, zhodna z vyznačalnikam numara, zvanki pastupajuć nibyta z telefona hałoŭnaha redaktara rasijskaj «Novoj haziety» Dźmitryja Muratava. Sam Dźmitryj Murataŭ, jaki dobra znajomy z žurnalistkaj, viadoma, nie ŭ kursie hetych padziej. Žurnalist, kali jamu patelefanavała Radzina, jakraz sustrakaŭsia ź Michaiłam Harbačovym.
Charakterna, što ŭ minułym hodzie praz artykuły, jakija krytykavali Alaksandra Łukašenku, hetak ža atakavalisia telefony samoha hałoŭreda «Novaj», pryčym telefon pakazvaŭ numar Natalli Radzinaj.
«Z pačućciom humaru ŭ biełaruskich śpiecsłužbaŭ, jak i z mazhami, zaŭsiody byli prablemy. Upeŭnienaja, što telefony błakujuć, bo ŭ suviazi z bajkotam łukašenkaŭskich „vybaraŭ“ da Biełarusi prykavanaja suśvietnaja ŭvaha, u mianie šmat mižnarodnych sustreč, kantaktaŭ z palitykami i žurnalistami. Nie vyklučana, što budu źviartacca ŭ polskuju prakuraturu z prośbaj pravieści rasśledavańnie», — skazała Radzina.
Raniej, nahadajem, taki ž sposab błakavańnia ŭžyvaŭsia ŭ dačynieńni da žurnalistki Iryny Chalip.