Astranomy Biełarusi i Rasii adkryli nadzvyčaj jarkuju kamietu

26.09.2012 / 9:36

Astranomy Vital Nieŭski ź Biełarusi i Arciom Navičonak z Rasii adkryli kamietu, jakaja moža stać samaj jarkaj za 10 hadoŭ, paviedamlaje sajt absiervatoryi ISON-NM.

Kamieta była adkryta 21 vieraśnia ŭ absiervatoryi ISON-Kislovodsk Mižnarodnaj navukovaj sietki aptyčnych instrumientaŭ, raźmieščanaj pablizu Kisłavodska. Kamietnaja pryroda abjekta była paćvierdžana na niekalkich bujnych teleskopach, pieršym ź jakich byŭ paŭtaramietrovy teleskop Majdanakskaj absiervatoryi va Uźbiekistanie. Novaj kamiecie prysvojeny indeks C/2012 S1 (ISON).

Najbližejšuju kropku da Sonca kamieta pavinna prajści ŭ kancy listapada 2013 hoda na adlehłaści krychu bolš čym 0,1 astranamičnaj adzinki.

«Kali kamieta nie razburycca na padlocie, jak heta ŭžo było z kamietaj C/2010×1 (Elenin), to nas čakaje, mahčyma, samaja jarkaja kamieta dziesiacihodździa, jakaja zmoža zaciamnić kamietu C/2011 L1 (Pan-STARRS)», — havorycca na sajcie absiervatoryi ISON-NM. Ciapier kamieta znachodzicca za arbitaj Jupitera i maje blask kala 18-j zornaj vieličyni.

U chodzie ŭdakładnieńnia arbity kamiety roznymi absiervatoryjami vyśvietliłasia, što jana ŭžo nazirałasia nočču 28 śniežnia 2011 hoda i 28 studzienia 2012 hoda na absiervatoryjach Mt. Lemmon i Pan-STARSS 1 adpaviedna. «Možna ź vialikaj upeŭnienaściu havaryć ab arbicie novaj kamiety», — havorycca ŭ paviedamleńni ISON-NM

Čytajcie taksama:

Kamientary da artykuła