Źmicier Daškievič siomy dzień trymaje haładoŭku; spynić, kali načalstva kałonii pierastanie jaho ckavać
Staršynia mižnarodnaj arhanizacyi «Małady front» Źmicier Daškievič, jaki znachodzicca ŭ mazyrskaj kałonii, siomy dzień trymaje haładoŭku. Daškievič źmieščany ŭ karcar, a pryčynaj haładoŭki stali «niečałaviečyja pavodziny administracyi kałonii, u tym liku jaje načalnika Juryja Zbaroŭskaha».
Daškievič zajaviŭ, što spynić haładoŭku tolki ŭ tym vypadku, kali «turemnaje načalstva pierastanie jaho ckavać i pačnie adekvatna da jaho stavicca, a taksama paprosić prabačeńnia za minułyja źniavahi i pahrozy», paviedamlaje
26 vieraśnia namieśnik staršyni «Maładoha frontu» Nasta Pałažanka razam z advakatam jeździli ŭ mazyrskuju kałoniju, kudy Daškievič byŭ pieraviedzieny 19 vieraśnia.
«Źmicier skazaŭ, što jak tolki jaho siudy pryvieźli, pačalisia źniavahi i nacisk na jaho, jak jon kaža, pa relihijnaj prykmiecie. 21 vieraśnia jon abjaviŭ haładoŭku. Jašče viadoma, što jaho źmiaścili ŭ karcar.U hutarcy sa mnoj načalnik režymnaha adździeła pryhraziŭ što, kali štości źjavicca ŭ ŚMI, to Daškieviču budzie tolki horš. Ale ja nie baču inšaha varyjantu, aprača abviaščeńnia hetych žudasnych rečaŭ», — raspaviała Pałažanka.
***
Nahadajem, 28 žniŭnia Hłybocki rajonny sud na zakrytym vyjaznym pasiadžeńni ŭ kałonii № 13 rajcentra pryznaŭ Daškieviča vinavatym u «złosnym niepadparadkavańni patrabavańniam administracyi papraŭčaj ustanovy» (častka 1 artykuła 411 Kryminalnaha kodeksa) i pryhavaryŭ jaho da hoda pazbaŭleńnia voli. U termin pakarańnia ŭklučany čatyry miesiacy, jakija apazicyjanieru zastavałasia adbyć u kałonii pa pieršaj kryminalnaj spravie.
U kałonii Hłybokaha lidar «Maładoha frontu» adbyvaŭ pakarańnie pa kryminalnaj spravie, raspačataj u kancy 2010 hoda. Napiaredadni apošnich vybaraŭ prezidenta, 18 śniežnia 2010 hoda, Daškieviča i jaho tavaryša pa «Maładym froncie» Eduarda Łobava zatrymali ŭ Minsku pa abvinavačvańni ŭ źbivańni dvuch mužčyn. U sakaviku 2011 hoda Daškievič byŭ pryhavorany da dvuch hadoŭ pazbaŭleńnia voli ŭ kałonii ahulnaha režymu. Pradstaŭniki apazicyi i pravaabaroncy rascanili aryšt Daškieviča i Łobava, pryhavoranaha da čatyroch hadoŭ pazbaŭleńnia voli, jak previentyŭnuju mieru pa «začystcy» aktyvistaŭ apazicyi napiaredadni vybaraŭ. Mižnarodnyja pravaabarončyja arhanizacyi pryznali Daškieviča i Łobava palityčnymi źniavolenymi.