Rabotnik MTZ vykraŭ z pradpryjemstva 18 ton listavoj stali

Kryminalnaja sprava za kradziež u asabliva bujnym pamiery raspačata ŭ dačynieńni da 29-hadovaha rabotnika Minskaha traktarnaha zavoda, jaki zajmaŭsia pastaŭkami mietału ŭ adras Babrujskaha zavoda traktarnych detalej i ahrehataŭ. Jon padazrajecca ŭ kradziažy z MTZ 18 ton listavoj stali.

Jak paviedamili ŭ HUUS Minharvykankama, padrychtavaŭšy zahadzia nieabchodnuju dakumientacyju (padroblenuju), mužčyna paprasiŭ svajho kalehu aformić adhruzku mietału na Babrujski zavod, nibyta pa ŭkazańni kiraŭnictva pradpryjemstva. Toj zhadziŭsia. Praŭda, u błanku adsutničaŭ adzin z podpisaŭ, jaki padazrony potym padrabiŭ. Taksama jon damoviŭsia ab transparciroŭcy stali. Nie padazrajučy ničoha kiepskaha, hetuju misiju za 500 dołaraŭ uziaŭ na siabie vadziciel hruzavika, jaki nakiroŭvaŭsia ŭ Babrujsk.

Rabotniki składa, pravieryŭšy falšyvuju dakumientacyju i nie ŭhledzieŭšy padmanu, zahruzili nieabchodnuju kolkaść mietału. Zatym hruzavik pajechaŭ u bok Babrujska, dzie za niekalki kiłamietraŭ da horada paviarnuŭ u viosku i razhruziŭsia.

Na nastupny dzień złamyśnik pad markaj akazańnia dapamohi ŭziaŭsia adnieści dakumienty kładaŭščycy ŭ buchhałteryju. Žančyna biez padazreńniaŭ pieradała nakładnyja kalehu, jaki pa šlachu źniščyŭ zroblenuju im ža padroblenuju nakładnuju. Adnak praź niekatory čas kładaŭščyca vyrašyła ŭdakładnić u partnioraŭ z Babrujska, ci pryniali jany hruz. Pačuŭšy, što nijakaha listavoha mietału jany nie atrymlivali, žančyna zabiła tryvohu.

Padčas praviadzieńnia kompleksu apieratyŭna-vyšukovych mierapryjemstvaŭ supracoŭnikami adździeła pa baraćbie z ekanamičnymi złačynstvami Partyzanskaha RUUS stalicy vykradzieny mietał byŭ znojdzieny ŭ vioscy Biarozavičy Babrujskaha rajona, a jaho vykradalnik zatrymany. Spačatku mužčyna admaŭlaŭ svaju vinu, ale paźniej pryznaŭsia i patłumačyŭ, što vykradzienyja 18 ton mietału koštam amal 140 miljonaŭ rubloŭ chacieŭ pradać pa schodnaj canie.

Kamientary da artykuła