Amierykanskija ŭražańni Lavona Volskaha
Lavon Volski viarnuŭsia z Amieryki. Što jon tam rabiŭ i jak pryniała jaho tamtejšaja publika, — raspaviadaje sam muzyka.
Lavon Volski: «Na kancercie ŭ Ńju‑Jorku ŭ kłubie «Chuk» małaja častka była amierykancaŭ, u asnoŭnym byli maładyja biełarusy, jakija tam vučycca, pracujuć ci prosta byli vymušanyja źjechać pavodle palityčnych asablivaściaŭ našaj dziaržavy.
Pryniali vielmi ciopła: tam adbyvajecca mała kulturnych biełaruskich akcyjaŭ. Druhaja akcyja była ŭ Kalifornii. Prosta sustreča sa słuchačami na plažy, tam było čałaviek 30‑40, spakojnaja takaja viečarynka. Nakont arhanizacyi, nie mahu skazać, što jana spadabałasia ci nie spadabałasia, ale zbojaŭ nie było».
Mara Nalšanskaja: «Ci paščaściła amierykanskaj publicy pačuć novyja pieśni N.R.M.?»
Lavon Volski: «Biezumoŭna nie, bo ja byŭ adzin. Tam byli muzyki z Navapołacku, jakija vymušanyja zaraz znachodzicca ŭ Złučanych Štatach, — jany padabrali akampaniemient da chitoŭ «Krambambuli», N.R.M. i Zet. Ale novy albom my budziem prezientavać z hurtom, darečy ŭ Varšavie, niedzie ŭ 10 ličbach nastupnaha miesiaca».
Mara Nalšanskaja: «A kali ž novy albom budzie prezientavany biełarusam?»
Lavon Volski: «Vielmi ciažka skazać, bo ŭ nas prablemy z arhanizacyjaj kancertaŭ, jakija nie palahajuć na nas. Biezumoŭna, budziem niejak prezientavać albom, ale dzie i kali — ciažka pakul skazać».
Taksama ja zapytałasia ŭ Lavona, ci budzie mieć niejki praciah jaho vizit u ZŠA. Kantrakty, dalejšyja kancerty...
Lavon Volski: «Kantraktaŭ nijakich niama i naŭrad ci jany buduć. Ale treba pieryjadyčna naviedvać hetuju ziamlu, bo tam vielmi šmat našych ludziej, jakija prahnuć našaj muzyki. My prosta jeździli dziela taho, kab tam damovicca ab niejkim abmienie, kab vyvozić tudy hurty. I ja liču, što ŭ nas heta atrymałasia: tam jość ludzi, jakija zaraz buduć hetym zajmacca.
Mianie bolš za ŭsio cikaviać N.R.M. i «Krambambula», ale jak tolki buduć naładžanyja prynamsi pieršyja dva kancerty, možna budzie razmaŭlać pra «Pałac», «Kramu», Neuro Dubel».