Na «BiełAZie» vyjaŭlena kala sotni fiktyŭnych damovaŭ na žyllo
Supracoŭniki ABEZ Žodzinskaha HAUS vyjavili na AAT «BiełAZ» 95 fiktyŭnych damovaŭ, zaklučanych rabotnikami pradpryjemstva.
Načalnik ABEZ Žodzinskaha HAUS Valeryj Astapovič paćvierdziŭ, što taki fakt sapraŭdy mieŭ miesca, ale kateharyčna admoviŭsia paviedamlać padrabiaznaści. Pavodle jaho słovaŭ, dać infarmacyju pa spravie moža tolki UUS Minabłvykankama ŭ tym abjomie, u jakim paličyć patrebnym. Miž tym na samim pradpryjemstvie ŭžo šmat što kažuć.
Jak zdoleŭ vyśvietlić «Ježiednievnik», u vyniku praviedzienaj pravierki ABEZ Žodzinskaha HAUS vyjaviŭ na pradpryjemstvie 95 fiktyŭnych damovaŭ najmu žyłych pamiaškańniaŭ, jakija rabotniki zavoda zaklučyli na 2012 hod. Kožnaja takaja damova davała prava na atrymańnie kampiensacyi z boku AAT «BiełAZ» u pamiery 515 tys. rubloŭ. Inšymi słovami, štomiesiac pradpryjemstva stračvała amal 49 miljonaŭ rubloŭ. Jak adrapartavaŭ ŭ MUS ABEZ Žodzinskaha HAUS, u vyniku pryniatych mieraŭ atrymałasia praduchilić naniasieńnie zavodu škody na sumu bolš za 580 miljonaŭ rubloŭ. I heta tolki za adzin 2012 hod. Va ŭsich rabotnikaŭ, jakija ŭ 2012 hodzie paśpieli atrymać kampiensacyju, hrošy buduć vyličanyja z zarobku.
Miž tym krynicy na pradpryjemstvie raskazali, što praktyka atrymańnia kampiensacyi za zdymańnie kvatery rabotnikami «BiełAZa» vykarystoŭvałasia ŭžo daŭno. Ale zaraz budzie dosyć składana pravieryć, jakija z pradstaŭlenych damovaŭ byli realnymi, a jakija — fiktyŭnymi. Taksama składana vyśvietlić, ci mieła svoj intares u hetaj afiory administracyja pradpryjemstva. Jak kažuć na zavodzie, takaja masavaja padača ŭ buchhałteryju fiktyŭnych damovaŭ prosta nie mahła prajści niezaŭvažanaj toj ža buchhałteryjaj i słužbaj biaśpieki «BiełAZa», jakaja, miž inšym, tam vielmi surjoznaja. Pavodle adnoj ź viersij, jakaja chodzić na zavodzie, administracyja zakryvała na heta vočy, vykarystoŭvajučy hety fint jak adzin sa sposabaŭ pavyšeńnia dachodaŭ rabotnikaŭ.
Zrešty, jak realna išli spravy z hetymi machinacyjami, zmoža vyśvietlić tolki rasśledavańnie. Ale pakul niezrazumieła, ci idzie jano i ci budzie naohuł. Načalnik ABEZ Žodzinskaha HAUS kateharyčna admoviŭsia adkazvać na hetaje pytańnie.