Prajekt tureckaha hatela z kazino i načnym kłubam u centry Minska vyniesieny na hramadskaje abmierkavańnie

Pra toje, što na skryžavańni vulic Vaładarskaha i Haradskoha Vała ŭ centry Minska turecki inviestar źbirajecca pabudavać 16-paviarchovy hatel, paviedamlałasia ŭ červieni hetaha hoda.

Tady eskizy kompleksu źjavilisia na sajcie pradpryjemstva «Tvorčaja majsternia — 7». Pavodle infarmacyi «Anłajniera», na toj momant mierkavany zakazčyk jašče vioŭ pieramovy ź Minharvykankamam. Miarkujučy pa ŭsim, haradskija ŭłady pajšli nasustrač tureckim biznesoŭcam: z učorašniaha dnia ŭ Minsku pačałosia hramadskaje abmierkavańnie hetaha nieadnaznačnaha prajekta.

Hetym razam abmierkavańnie prachodzić u vielmi dziŭnaj formie. Ni zakazčyk, jakim vystupaje ZTAA «Aras-inviest», ni architektary, ni čynoŭniki nie tolki nie pažadali sustrakacca ź miascovymi žycharami, ale navat nie supravadzili eskizy tekstavaj infarmacyjaj. Z raźmieščanych u chole administracyi Maskoŭskaha rajona prajektnych materyjałaŭ niezrazumieła, jakija spadarožnyja abjekty budzie ŭklučać hatel, kolki stvarajecca mašyna-miescaŭ i h.d.

Niezrazumieła i toje, čamu hetym razam nie praduhledžanaja urna dla zaŭvah pa prajekcie.

Zastajecca tolki jašče raz pryvieści infarmacyju, raźmieščanuju raniej na sajcie «Tvorčaj majsterni — 7». Paviedamlałasia, što dva padziemnyja pavierchi kompleksu adviedzienyja pad haraž-stajanku na 78 mašyna-miescaŭ. Na pieršym paviersie raźmieściacca viestybiul, kaviarnia-bar ź letniaj terasaj i SPA-centr. Druhi pavierch zojmie kazino, na trecim akramia hatelnych numaroŭ raźmieścicca restaran. 4–14 pavierchi addadzienyja pad numary, na 15-m zaprajektavany šmatfunkcyjanalnyja zały, a na 16-m — načny kłub.

U ciapierašni čas na miescy mierkavanaha hatela haścinicy raźmiaščajecca aŭtastajanka MUS.

Nahadajem,

suprać budaŭnictva tureckaha hatela ŭ centry Minska vystupiła Biełaruskaje tavarystva achovy pomnikaŭ historyi i kultury.

«Užo na dadzienym etapie prajektavańnia parušany artykuł 29 Zakona „Ab achovie historyka-kulturnaj spadčyny Respubliki Biełaruś“, jaki zabaraniaje raspracoŭku horadabudaŭničaj i ziemleŭparadkavalnaj dakumientacyi biez naniasieńnia ŭstalavanych zon achovy historyka-kulturnych kaštoŭnaściaŭ, — pisaŭ u lipieni staršynia hetaha hramadskaha abjadnańnia Anton Astapovič. — A tut i miaža histaryčnaha centra, i budynki na Vaładarskaha 1, jakija majuć status pomnikaŭ, ale nie majuć ustalavanych zon achovy».

Zaŭvahi i prapanovy pa prajekcie da 22 listapada možna nakiroŭvać u administracyju Maskoŭskaha rajona Minska.

Kamientary da artykuła