Siarhiej Paŭłoŭski. Viera — nia rozum

Viera — nia rozum

Kali b vieryłasia rozumam, dyk my, biełarusy, na kožnym kroku mahli b kazać adzin adnomu, što my čužyja pa viery i, u lepšym vypadku, što nam treba niejkim čynam suisnavać. Rozumam naradžajucca tyja etničnyja kanflikty, kali adzinstva čałaviečaha patajemnaha sastupaje miesca ŭśviadomlenaj roźni. Jak u toj Juhasłavii. Rozumam my šukali ŭ adnym z papiarednich numaroŭ «NN» padstavaŭ słavianskaha adzinstva i nie znajšli. Rozumam piša Nił Hilevič svoj vierš z pryśviačeńniem serbskamu siabru i pabracimu Mamčyłu Džerkaviču:

 Zhrai — heta jon pra NATO. A ja hladžu ŭ Internecie na fotazdymki tych samych etničnych čystak, pierad jakimi papiaredžańnie — da 18 hadoŭ siudy zazirać nia varta — paniaviečanyja dziciačyja cieły i cełyja vioski składzienych u šerah trupaŭ, tvary z vyrvanymi vačyma dy inšaje vyčvarstva, i ŭsio chaładzieje ŭ siaredzinie. Ja nia viedaju, što takoje pravasłaŭnaje słavianskaje adzinstva i kali heta — jano, dyk patajemnaje mnie padkazvaje, što ja nia prosta nia zhodny ź im, ale što jaho nie pavinna być. NATO bambić serbskich vajskoŭcaŭ za toje, što tyja katujuć i zabivajuć albanskich dziaciej, starych, mužčyn i žančyn. Za toje, što vyhnali miljon ludziej ź ichnaje ziamli, dzie tyja składali 90 pracentaŭ nasielnictva. Za toje, što jany ničym nie adroźnivajucca ad fašystoŭskich karnikaŭ u biełaruskich vioskach. Jak možna salidaryzavacca z karnikami? Jakim pačućciom padkazanaja takaja salidarnaść? Miž tym, albancy nadta padobnyja da biełarusaŭ — svajoj pakoraju i niazdolnaściu baranić ułasnuju ziamlu. Ichnaje farmavańnie nacyi zaciahnułasia, jak i našaje. Ale zaraz jano musić iści patrojnymi tempami. Jasna, što takoha jany nie darujuć nikoli. I heta budzie ŭ ich pieradavacca z pakaleńnia ŭ pakaleńnie jak patajemnaje. U adroźnieńnie, darečy, ad Hilevičavaha słavianskaha adzinstva, jakoje prydumanaje mazhami i tamu dazvalaje ŭstavać na bok nieludziaŭ. Na dziva zbliziŭsia tut narodny paet z narodnym prezydentam, jaki, praŭda, spraviadliva salidaryzujecca nia z serbami, a z kaleham Miłošavičam. Adčuvaje padabienstva losu.

Siarhiej Paŭłoŭski