Andrej Skurko. Biełaruskaja pryvatnaja škołka

 Andrej SKURKO

Biełaruskaja pryvatnaja škołka

U mienskim pavietry ŭparta lotali čutki, što adčyniajecca pieršaja ŭ našaj krainie pryvatnaja škoła. «Ułasna pra škołu jašče havaryć rana», — rasčaravaŭ nas Aleh Trusaŭ, staršynia Tavarystva Biełaruskaj Movy. Pieršapačatkova heta budzie mieć vyhlad niadzielnaje klasy, jakuju dzieci zmohuć naviedvać paralelna z zaniatkami ŭ ahulnaadukacyjnaj škole.

Inicyjatyva stvareńnia novaj navučalnaje ŭstanovy zychodzić ad hrupy pradprymalnikaŭ, jakija žadajuć, kab ich dzieci atrymali sapraŭdy biełaruskamoŭnuju adukacyju (uvohule, treba adznačyć, što siońniašniaje kiraŭnictva TBM bolš aktyŭna, čym raniejšaje, supracoŭničaje ź biznesmenami), majučy na mecie stvareńnie biełaruskaje nacyjanalnaje buržuazii, bieź jakoj, jak śćviardžaje sp.Trusaŭ, «Biełaruś nikoli nia budzie niezaležnaj». Tyja ž biznesoŭcy biaruć na siabie finansavaje zabieśpiačeńnie prajektu (akład nastaŭnika budzie dzieści ŭ dva razy pieravyšać siaredniestatystyčny). Z pamiaškańniem taksama prablemaŭ niama — zaniatki možna pravodzić u zali štab-kvatery TBM (dzie, darečy, u 1997—1998 h. mieściłasia redakcyja «Našaj Nivy»). Aleh Trusaŭ uskładaje vialikija nadziei na hetuju maleńkuju klasu (da 12 vučniaŭ) i źbirajecca vychoŭvać tut sapraŭnych patryjotaŭ. Planujecca, što dzieci buduć chadzić na ekskursii, u muzei, teatry. Z kadrami, jakija b nie pierachodzili ź biełaruskaje na nižaharodzkuju, prablemaŭ niama — TBM moža dać nia tolki siaredniuju, ale i ŭniversyteckuju adukacyju (čamu i zmahajecca za Nacyjanalny ŭniversytet).

Nastroj u zasnavalnikaŭ — vielmi aptymistyčny. Rana ci pozna klasa pieraraście ŭ paŭnavartasnuju pryvatnuju škołu, paśla — u cełuju systemu pryvatnych škołaŭ, jakija buduć stvarać kankurencyju škołam dziaržaŭnym i, tym samym, padtrymlivać jakaść vykładańnia ŭ ich na naležnym uzroŭni.