Ź Biełarusi za subotu j niadzielu
№ 22 (143), 1999 h.
Ź Biełarusi za subotu j niadzielu
Paźniak nia pojdzie nijak
Na Sojmie BNF u subotu vyrašyli, što druhi etap źjezdu adbudziecca 30—31 kastryčnika. Ideju Zianona Paźniaka pra raździeł Frontu na dźvie arhanizacyi nie padtrymali i pryniali rezalucyju «Nie dapuścić raskołu!» Vyznačyli, što rašeńnie Paźniaka ab adchileńni Barščeŭskaha ad pasady i pryznačeńni asobnaha źjezdu partyi BNF niepravamocnaje. Tady častka pasłoŭ Sojmu admovilisia rehistravacca i sami abjavili Sojm niepravamocnym. I ŭvieś hety śmiech z-za adnaho lidera, jaki nia ŭmieje choraša syści.
Takija daktary
U Bieraści adzin čałaviek, Uładzimier K., zachvareŭ na hiemaroj, pajšoŭ da daktaroŭ, tyja jamu vypisali leki, a nie skazali, što jany niesumiaščalnyja z alkaholem (mo j nia znali). A jon uvohule nia piŭ, ale trochi vypivaŭ. Nu, i źjeŭ tych tabletak dy ŭviečary trochi vypiŭ — užo dva tydni ŭ encefalitnym stanie lažyć u reanimacyi.
Ź Bieraścia — Alaksandra Koŭtun
Svaja hordaść
Učora ŭ klubie «Tytanik» ckončyŭsia pieršy ŭ historyi hiej-festyval «Gay Pride Belarus `99". U piatnicu pačatak konkursu charastva «Tranśmisija-99» (konkurs pieraapranańniaŭ u žančyny) sarvali amonaŭcy ŭ čornych maskach z aŭtamatami. Jany ŭvarvalisia i stali ŭsich abšukvać. Byccam by šukali narkotykaŭ, ale ničoha nie znajšli. Adzin udzielnik konkursu nia daŭsia abšukvać siabie, dyk jaho źbili. Kvitki na festyval kaštavali 2 miljony.
Ksiandzy nia pjuć
U Łazdunach Iviejskaha rajonu adbyŭsia antyalkaholny duchoŭny ŭrok. Sabralisia ludzi, jakija pastanavili pazbavicca drennaj zvyčki, i tyja, jakim heta ŭdałosia, a taksama śviatary. Byli navat dva ksiandzy, jakija daŭno pierastali być alkaholikami i ciapier usim pra heta raspaviadajuć. Damovilisia ŭ kancy vieraśnia sabracca znoŭ. Pryčym zaprosiać hetym razam jašče j žonak ananimnych alkaholikaŭ, i pravasłaŭnych papoŭ-pjanic. Prydumaŭ takija spatkańni łazdunski probašč M.Illaševič.
BASu — 10
18 vieraśnia Biełaruskaje abjadnańnie studentaŭ u Polščy (BAS) adznačyć svaje 10-ja ŭhodki. Z nahody ŭ Supraśli ŭ kulturnym asiarodku «Pušča» adbudziecca ŭračystaja viečaryna. Siarod zaprošanych – haradzienski bard Viktar Šałkievič. Miarkujecca, što j Siaržuk Sokałaŭ-Vojuš z Prahi padjedzie.
Z Horadni — Anton Łabovič