Listy ŭ redakcyju
№ 22 (143), 1999 h.
Listy ŭ redakcyju
Dva žurnalisty vyjšli z BAŽu
Siabry Viciebskaj haradzkoj filii Biełaruskaj Asacyjacyi Žurnalistaŭ, redaktar hazety «Vybar» Barys Chamajda i žurnalist «Vitinfarmbiuro» Juraś Karpaŭ zajavili pra svoj vychad z hetaj hramadzkaj arhanizacyi. Jany dasłali ŭ redakcyju list, dzie tłumačać svajo rašeńnie nastupnym čynam:
«Pry kancy žniŭnia ŭ Viciebskuju filiju BAŽ dasłali novy Statut arhanizacyi. U Statucie źjaviłasia dapaŭnieńnie: «HA «BAŽ» dziejničaje ŭ adpaviednaści ź dziejučaj Kanstytucyjaj RB, Dekretam Prezydenta RB ad 26.01.99h. №2 «Ab niekatorych mierach pa ŭparadkavańniu dziejnaści palityčnych partyjaŭ, palityčnych sajuzaŭ, inšych hramadzkich abjadnańniaŭ». My razhladajem heta jak pryznańnie prezydenckaj kanstytucyi. Pakolki my prytrymlivajemsia ŭ svajoj hramadzka-palityčnaj dziejnaści Kanstytucyi 1994 h., my nia majem namieru praciahvać svajo siabroŭstva ŭ arhanizacyi, jakaja faktyčna pryznała dziaržaŭny pieravarot».
Aŭtary demaršu kanstatujuć źmianšeńnie ŭpłyvu biełaruskamoŭnych žurnalistaŭ, asabliva z rehijonaŭ, u BAŽy. Varta nahadać, što źmieny ŭ Statucie pryniali na apošnim źjeździe arhanizacyi.
Biełaruski videaklub
Jak pravieści volny čas biełaruskamoŭnamu biełarusu? Z knihami prablem amal niama. Z muzykaj bolš-mienš lohka — časam zdarajucca kancerty biełaruskamoŭnych hurtoŭ, jość kasety, raniej byli svaje dyskateki (časam jany znoŭ źjaŭlajucca j źnikajuć). Ale hetaha mała.
Apošnim časam źjaviłasia jašče adna mahčymaść adpačyć pa-biełarusku. Ciapier biełarusy mohuć bavić svoj čas la ekranu, bo štosubotu a 18-j hadzinie na siadzibie TBM (Rumiancava, 13) adbyvajucca prahlady videastužak (mastackich, multyplikacyjnych) na biełaruskaj movie: «Isus», «Piaty element», «Stračany śviet: Jurski park-2», «Sałodki jad kachańnia», «Daroha na Kurapaty», «Pryhažunia ŭ sonnym lesie», «Alisa ŭ krainie cudaŭ», «Bałta» i inšyja. Videateka ŭvieś čas pašyrajecca. U «Biełaruskim videaklubie» TBM Vas čakaje adpačynak u atmasfery rodnaj movy i dobraja kampanija.
Vital Stanišeŭski