Viestki ź Litvy
№ 22 (143), 1999 h.
Viestki ź Litvy
Skandał vakoł Łukašenki
Tak nichto i nie razabraŭsia, ci heta praŭda była ci «kačka», što litoŭskamu prezydentu V.Adamkusu adrazu byli nie dali pavietrany kalidor, kab jon moh praź Biełaruś zalacieć u Jałtu, na sustreču kiraŭnikoŭ krainaŭ Bałtyjska-Čarnamorskaha rehijonu. A nie dali, maŭlaŭ, bo Łukašenka pakryŭdziŭsia, što jaho na toj forum nie zaprasili jak nielehitymnaha prezydenta.
Praŭda, kryŭdaŭ u Łukašenki na susieda moža być šmat. Niezdarma litoŭskija hazety na ŭsie łady heta ŭsio smakavali. I što Adamkus cierpić u Vilni Siamiona Šareckaha, nie prahaniaje, i što litoŭcy dazvolili biełaruskaje radyjo, jakoje budzie viaščać na Biełaruś i za zabaronu jakoha Łukašenka ŭžo dvojčy Adamkusa «pabłahadaryŭ», i — heta ŭžo asabistaje i tamu samaje mocnaje — toje, jak Adamkus skazaŭ pra Łukašenku ŭ krasaviku ŭ Vašynhtonie. Pryvodziać navat tuju cytatu: «Siońnia ŭsia ŭvaha — stanovišču ŭ Juhasłavii, pra Łukašenku — maŭčok. Albo jaho ihnarujuć, albo jahonaj dziejnaści nie nadajuć nijakaha značeńnia. Liču heta pamyłkovym. Budučy čałaviekam niepradkazalnym, u budučyni jon moža stvaryć prablemy. Treba spadziavacca, što samo žyćcio pakaža Łukašenku, što jon pavinien źmianić svaje pohlady».
Chto ž na takija kryŭdnyja słovy nie pakryŭdziŭsia b!
A što da niezaprašeńnia Łukašenki ŭ Jałtu, dyk inicyjataram hetaha byŭ nie Adamkus, i navat nie haspadar Kučma, a polski prezydent A.Kvaśnieŭski. (Vo abkłali, z usich bakoŭ!) Polski šef Słužby nacyjanalnaj biaśpieki Marek Siviec, jaki jeździŭ u Krym z Kvaśnieŭskim, rastłumačyŭ spravu takim čynam:
— Naša pazycyja adpaviadaje palitycy Polščy ŭ dačynieńni da Biełarusi. My nie pryznajem taho, jak Łukašenka ažyćciaŭlaje ŭładu. Jahonaja prysutnaść uskładniła b praviadzieńnie narady. Takuju samuju dumku majuć i lidery inšych krainaŭ, što sabralisia ŭ Jałcie.
A sabrałasia ich tam adzinaccać. I havaryli jany ŭ Livadyjskim pałacy, dzie 54 hady tamu «vialikaja trojka» (Stalin, Čerčyl i Ruzvelt) abmiarkoŭvali pavajenny padzieł Eŭropy. Napeŭna, u słovach pra toje, što prysutnaść Łukašenki ŭskładniła b forum, jość sens. Bo ŭsie pamiatajuć papiaredniuju sustreču prezydentaŭ — u Vilni, dzie Łukašenka narabiŭ skandału ŭ źviazku z prydumanym zamacham na jahonaje žyćcio. Praŭda, nie raźličyli prezydenty, što adsutnaść Łukašenki nie pazbaŭlaje ad skandału ź jahonaj asobaj. Tak jano vyjšła i na hety raz.
Lićvin