«Talerantny» futboł

«TALERANTNY» FUTBOŁ

Kali paśla chatniaje parazy ad valijcaŭ zbornaja Biełarusi adpraviłasia ŭ Švejcaryju, mała chto sumniavaŭsia ŭ tym, jaki budzie vynik pajezdki. Tak i vyjšła: biełaruskija futbalisty iznoŭ pakazali, jak «upeŭniena» i «pryhoža» jany ŭmiejuć prajhravać. Pryčym zbornaja Švejcaryi była na poli, u lepšym vypadku, nia horšaj za biełarusaŭ. I pieraŭzyšła tolki ŭ adnym — u voli da pieramohi. Paŭtaryłasia karcina, jakuju my nazirali ŭ Kardyfie, Kapenhahienie, u chatnich sustrečach z tymi ž švejcarcami j valijcami: biełarusy dakazali ŭsim, što jany ŭmiejuć hulać, ale nia ŭmiejuć vyjhravać.

Samaja častaja dumka, jakuju ciapier vykazvaje na pres-kanferencyjach Michaił Vierhiajenka: nie pašancavała, prajhrali ŭsiaho adzin miač i h.d. Bolš vierahodnaje tłumačeńnie — našyja futbalisty nia viedajuć, za jakuju krainu hulajuć, nie adčuvajuć taho, što ichnyja pieramohi tut niekamu patrebnyja. Nu, nia moža futbalist zbornaj addavać na poli ŭsie siły, kali kiraŭnictva krainy paprostu nienavidzić jaje, a absalutnaja bolšaść žycharoŭ abyjakavaja da svajho ŭłasnaha žyćcia.

Interviju, jakija dajuć trenery i sami spartoŭcy, robiać uražańnie, što jany vystupajuć za zbornuju BSSR, jakoj niečakana dazvolili vystupać samastojnaj kamandaj. Pad kiraŭnictvam Vierhiajenki i jahonaha trenerskaha štabu zbornaja Biełarusi praviała 13 aficyjnych sustrečaŭ (6 u adboračnym cykle da Čempijanatu śvietu 1998 hodu i 7 u ciapierašnim adboračnym cykli — da Čempijanatu Eŭropy 2000). Vynik: 11 parazaŭ, 2 ničyje, 0 pieramohaŭ, roźnica zabitych i prapuščanych miačoŭ 6—24. Apošniuju svaju aficyjnuju pieramohu zbornaja Biełarusi atrymała jašče za Siarhieja Baroŭskaha try hady tamu ŭ chatniaj sustrečy sa zbornaj Estonii. Paśla takich «pośpiechaŭ» trener musić padavać u adstaŭku. Prablema, adnak, u tym, što naŭrad ci ŭ našaj krainie zaraz znojdziecca specyjalist, jaki zdoleje pieramahčy «talerantnuju» psychalohiju našych «kumiraŭ».

Dla taho, kab dakładna ŭjavić sabie miesca našaj zbornaj u futbolnaj Eŭropie, dastatkova pahladzieć na kolkaść nabranych ačkoŭ — 2. Chto hulaje horš za nas? Zbornyja Andory, Luksemburhu, kniastva San-Maryna i Malty. Zbornaja Lichtenštejna, i taja nabrała ŭ svajoj padhrupie 4 ački. Paraŭnovać ža našyja pakazčyki z byłymi susiedziami pa «kamery» prosta soramna: łatyšy da apošniaha zmahalisia z narvežcami i słaviencami za pieramohu ŭ 2-j padhrupie, zbornyja Litvy i Estonii na roŭnych hulajuć z šatlandcami i da siońnia zachoŭvajuć šancy na pajezdku ŭ Beniluks. I Armienija, i Azerbajdžan, i Małdova vystupili bolš udała za zbornuju Biełarusi.

A.A.