Padziei

---

Padziei

 

Bura nad usioj Eŭropaj

Paŭnočnaju Eŭropaju pralacieła bura. U Švecyi, Danii, Niamieččynie i Narvehii zahinuli nia mienš za 15 čałaviek. Polskaje ŭźbiarežža i Pieciarburh zaliło. U Litvie śmierć napatkała dvuch, na adnaho ź ich, dzicionka, zvaliŭsia z chaty komin. U Biełarusi biez elektryčnaści zastalisia 1260 viosak i miastečak — dobraja vobłaść. Navat na stalinskich damach na Pryvakzalnaj płoščy ŭ Miensku šarpała blachu, i milicyjanty musili pierakryć na peŭny čas ruch pa tratuarach. Kažuć, heta była samaja mocnaja i praciahłaja bura za sto hadoŭ.

 

Hryb stvaryŭ ruch

120 delehataŭ stvaryli ŭ Miensku «Ruch za demakratyčnyja i svabodnyja vybary». Na schodzie vystupili Taciana Proćka, Mikałaj Plisko, Aleh Trusaŭ, Aleś Abramovič. Chočuć kantralavać vybary ŭ nastupnym hodzie, kab sumlenna pravodzilisia, buduć rychtavać naziralnikaŭ na ich.

B.T.

Talony na masła

U Klimavičach uviali talony na masła. Pradukcyju miascovaha masłasyrzavodu adpraŭlajuć zbolšaha ŭ Mahiloŭ i ŭ Miensk.

 

Łužkovu dali 7 hadoŭ z kanfiskacyjaj

36-hadovaha mahiloŭca Łužkova asudzili za handlovyja machinacyi. Jon atrymlivaŭ pa padrobnych dakumentach charčovyja tavary, masła, jaječny parašok, muku i pradavaŭ u Rasiei. A hrošaj pradpryjemstvam nie viartaŭ albo zusim, albo addavaŭ nia ŭsio. Tym nia mienš, jamu ŭdavałasia zaklučać usio novyja i novyja damovy z mahiloŭskimi pradpryjemstvami ciaham 3 hadoŭ. Ale da pary štuka ŭdajecca.

Z Mahilova — Symon Hłazštejn

 

Vočaradź k prezidzientu

10 śniežnia, u Mižnarodny dzień abarony pravoŭ čałavieka, pradstaŭniki bujnych partyjaŭ i pravaabarončych arhanizacyjaŭ planujuć naładzić novuju aryhinalnuju akcyju.

Pad viečar, ci to a 16-j dnia, ci to trochi paźniej da hramadzkaj pryjomnaj administracyi Łukašenki, što na vulicy Kirava zzadu prezydencyi, pryjduć usie achvotnyja ŭ zakonnym paradku pieradać u administracyju svajo patrabavańnie, sens jakoha ŭ tym, što «ja, hramadzianin Biełarusi, liču Łukašenku nielehitymnym i patrabuju, kab jon kinuŭ pasadu prezydenta».

Kupon z takim zvarotam planujecca nadrukavać u niezaležnaj presie ŭ apošnich pierad 10 śniežnia numarach. Tudy tre budzie tolki ŭpisać svajo proźvišča i imia.

Miarkujecca, što łancuh ludziej z zakonnymi petycyjami raściahniecca dosyć daloka, mahčyma, navat da praspektu, čym pryciahnie ŭvahu hramadzkaści da parušeńniaŭ pravoŭ čałavieka ŭ našaj krainie. Dazvołu na chadajnictvy nia treba.

Alaksiej Šydłoŭski

 

Novy svabodny rubiel

Pajšli čutki, što z Novaha hodu rublu nia tolki abrežuć nuli, ale i adpuściać jahony kurs u Nacbanku adnosna dalaru, i toj zraŭniajecca z rynkavym. Tady dalar možna budzie biez prablemaŭ kupić ci pradać pa sapraŭdnym, a nie padmannym kursie ŭ lubym abmieńniku. Rašeńnie, kali jano budzie, palehčyć usim žyćcio — uvohule heta budzie znak, što vertykalnaj ekanomicy hamon. Adzinyja, kaho hetyja čutki napužali — studenty-płatniki dziaržaŭnych i niedziaržaŭnych VNU, jakija płociać za adukacyju va ŭmoŭnych adzinkach pavodle kursu Nacbanku. Kali ciapier 800 albo 1000 «u.a.» nasamreč ujaŭlajuć saboju sumu ŭ dalarach na 40% mienšuju, što pad siłu ichnym baćkam, to paśla liberalizacyi mnoha chto pačuchaje patylicu, kali tolki rektaraty adrazu nia źniziać apłatu za adukacyju.

A.Š.

 

Chryścijanstva i palityka

3 śniežnia va Ŭpravie BNF adbyłasia kanferencyja «Biełaruskaja forma — chryścijanski źmiest», jakaja była nasamreč pryśviečanaja dačynieńniam chryścijanstva i palityki.

Bolš-mienš spałučyć hetyja dźvie źjavy atrymałasia, badaj što, tolki ŭ kaardynatara Chryścijanskaj inicyjatyvy (CHIT), Paŭła Sieviarynca, jaki niadaŭna viarnuŭsia z Kijeva. Źmiest vystupaŭ inšych udzielnikaŭ forumu — u zaležnaści ad taho, «ad palityki» abo «ad relihii» byŭ pramoŭca — zvodziŭsia abo da pamknieńniaŭ rabić palityku praz chryścijanstva, abo da sprobaŭ pieratvaryć chryścijanstva ŭ palityku. Pryčym pra palityku hamanili našmat bolš, čym pra vieru.

Na kanferencyi panavaŭ duch staražytnaje Judei, dzie 2000 hadoŭ tamu była «jakraz takaja sytuacyja» — terarysty-zyloty, pamiarkoŭnyja-farysei, kalabaranty-intehratary (z Rymskaj imperyjaj, praŭda), dylema Movy i Viery (pytańnie, jakuju vieru — u biełaruskaj sytuacyi — majuć na ŭvazie vystupoŭcy, stałasia b rytaryčnym i niepatrebnym: kanferencyja skłała ŭražańnie dziei vyklučna pratestanckaje — usie vystupoŭcy «ad relihii» vyznajuć evanhielskija płyni chryścijanstva).

Nieviadoma, ci zdoleje Chryścijanskaja inicyjatyva sapraŭdy stać hitom, ale ž zaŭsiody pryjemna bačyć ludziej mocnych, aptymistyčnych, jakija namahajucca štości rabić i vierać u siabie. U roli svojeasablivaha vox populi vystupili Lolik Uškin i Co, jakija «zavalilisia» na paŭhadzinki — ludziej pasłuchać i siabie pakazać, — ustalavaŭšy ŭ zali na čas svajho znachodžańnia viasiołuju atmasferu «Navinak», i źnikli hetak ža raptoŭna, jak i źjavilisia, nie pačuŭšy, vidać, dla siabie ničoha cikavaha.

A.S.

 

Biełaruski pikiet na Vacłaŭskaj płoščy

Biełarusy Čechii, zhurtavanyja ŭ supołku «Skaryna», i palityčnyja ŭciekačy, što atabarylisia ŭ Prazie, siońnia praviali pikiet pad bieł-čyrvona-biełymi ściahami na Vacłaŭskaj płoščy. Pikietoŭcy razdavali ludziam ulotki «Kremal, jaki viadzie antyčałaviečnuju vajnu ŭ Čačenii, jaki zachłynuŭsia ŭ karupcyi, u jakim ciapier panujuć štatnyja supracoŭniki KHB, imkniecca pazbavić Biełaruś niezaležnaści. My, biełarusy, nikoli nie pahodzimsia sa strataj niezaležnaści i budziem zmahacca. Abaronim Eŭropu ad rasiejskaha imperyjalizmu j łukašyzmu!». Arhanizatary źbirajucca pravieści 13 śniežnia pikiety la biełaruskaj i rasiejskaj ambasadaŭ. Z Prahi — V.K.

A.S.