Naviny

---

 NAVINY

 

Junak skinuŭsia z televiežy

Usia Horadnia havoryć pra samahubstva 25-hadovaha mužčyny. Pozna ŭviečary jon zalez na televizijnuju viežu i skinuŭsia z vyšyni 116 metraŭ. Padobnaje zdaryłasia ŭpieršyniu. Pierad skačkom pryjechała navat milicyja, ale ničoha zrabić nia zdoleła. Trahiedyja adbyłasia ŭ pieradapošni dzień studzienia. Usiaho za studzień na Haradzienščynie zrabili sabie śmierć 28 čałaviek. Letaś za hod takich było 410 vypadkaŭ. Zbolšaha ludzi viešajucca.

S.M.

 

Bykaŭ pierajedzie ŭ Niamieččynu

Vasil Bykaŭ nia vierniecca ŭ Biełaruś, ale pierajedzie prynamsi na hod u Niamieččynu na zaprašeńnie tamtejšaha PEN-centru. Pieršymi heta paviedamili nie biełaruskija, a rasiejskija mas-medyja.

 

U Viarchoŭnym Saviecie

U subotu ŭ Miensku prajšła pieršaja ŭ hetym hodzie sesija Viarchoŭnaha Savietu. Staršynstvavaŭ Anatol Labiedźka. Na sesii vystupiŭ Hans-Hieorh Vik, pradstaŭnik ABSE. Hałoŭnaj temaj była budučaja padrychtoŭka zakonu pra vybary. Ad 20 lutaha jaho majuć rychtavać da druhoha čytańnia. Značyć, Viarchoŭny Saviet usio spadziajecca na revalucyjnaje raźvićcio padziejaŭ.

 

Usie chočuć bačyć Čyhira

Biełaruskaja Asacyjacyja Žurnalistaŭ vystupiła z rezkim asudžeńniem taho, što ŭ zalu pasiedžańniaŭ, dzie byŭ sud nad Čyhirom, ludzi ŭ milicejskaj formie i ŭ cyvilnym nie dapuskali na hetym tydni žurnalistaŭ, u tym i karespandentku «Našaj Nivy» Tacianu Śnitko. Zala pasiedžańniaŭ, i praŭda, i blizka nie źmiaščaje ŭsich, chto choča tudy trapić. Ale achoŭniki nadta ŭžo biespamyłkova vychoplivali z natoŭpu peŭnych žurnalistaŭ. Staršynia Viarchoŭnaha Sudu Biełarusi Valancin Sukała admoviŭsia nadać inšuju zalu, ale źviarnuŭsia da sumleńnia publiki, paprasiŭ ludziej damaŭlacca miž saboj, kab pa čarzie naviedvali pasiedžańni.

 

Papoŭski padatak

U Kryčavie baciuški znajšli dobry sposab palapšeńnia materyjalnaha stanu svajoj arhanizacyi: dobraachvotna-prymusovy prodaž kvitkoŭ na carkvu na pradpryjemstvach i ŭ kałhasach. Dziaruć dobryja hrošy.

Symon Hłazštejn

 

Paŭstahodździa na psiu mać

U Čerykavie znajšli badaj samy stary bankaŭski rachunak ci to vobłaści, ci to ŭsioj krainy. Haspadynia, 80-hadovaja babula, pakłała 4500 rubloŭ jašče ŭ 1945 hodzie. Tady na heta možna było nabyć chatu z usim dabrom. Ale vyrašyła babulka patrymać na knižcy hrošy. Darasło da 5000. Potym pačalisia źmieny, a babulka nie zaryjentavałasia. Voś i pražyła žyćcio…

Symon Hłazštejn, Mahiloŭ

 

Fiłaretu na lačeńnie

Uražanyja byli daktary Maleckaj bolnicy, kali ŭ paniadziełak 31 studzienia (sa spaźnieńniem, darečy) pryjšli atrymać svoj studzieński avans. Akazałasia, što, jak u lepšyja časy, ź ich u dobraachvotna-prymusovym paradku vyličyli hrošy na dabračynnyja bilety ŭ padtrymku Rasiejskaj pravasłaŭnaj carkvy koštam 100 novych rubloŭ. Lekaram dali pa 3 bilety, medsiostram — pa 2, sanitarkam — pa adnym.

Siaržuk Rusiecki, Biaroza

 

17 mikraskopaŭ

U Haradzienskim sielhasinstytucie z kabinetu skrali adrazu 17 mikraskopaŭ. Milicyja ličyć, što złodziej mieŭ kluč, bo na zamku niama śladoŭ uzłomu. Niadaŭna vučelniu naviedvaŭ sam Łukašenka, abiacaŭ zrabić universytetam.

S.M., Horadnia

 

Milicyja źmianiła valutčykaŭ

Užo katory dzień na rynku ŭ Astraŭcy niasuć dziažurstva milicyjanty. Milicyjanty sočać, kab nia daj Boh jaki čałaviek nie pamianiaŭ valutu ŭ valutčykaŭ. Milicyjanty čas ad času stajać tam, dzie raniej byli valutčyki. Dyk ludzi kažuć: «Vo, milicyja valutčykaŭ vycieśniła».

Jury Haŭryłaŭ, Astraviec

 

Mytniki papalisia

Na mytni «Katłoŭka» Ašmianskaj dzialanki z padazreńniem na chabar aryštavanyja inspektar i načalnik źmieny. Jany patrabavali za bieśpieraškodny pravoz tavaraŭ u adnaho z našych hramadzianaŭ 100 dalaraŭ.

Ju.H.

 

Chadzić treba bolš

U Astraŭcy z pačatku miesiaca aŭtobusy chodziać tolki ŭ Horadniu i na stancyju Hudahaj, a kab dajechać u jakuju-niebudź viosačku — cełaja prablema. Kažuć, niama benzynu.

Marjan Vianhroŭski, Astraviec

 

Dar ad skulptara

Biełaruski skulptar Leanard Pakulnicki, jaki naradziŭsia na Astravieččynie, padaryŭ kaściołu Ŭzvyšeńnia Śviatoha Kryža abraz Maci Boskaj Miłasernaj. Heta abraz — kopija cudatvoranaha abrazu Maci Boskaj Astrabramskaj.

M.V.