Bohuś Bijatlanionak. Załatyja alimpijcy
№ 6 (163), 7 — 14 lutaha 2000 h.
Załatyja alimpijcy
Padrychtoŭka kožnaha ź ich kaštuje nam pad 100 tysiač dalaraŭ
15 vieraśnia ŭ aŭstralijskim horadzie Sydnei raspačnucca 27-ja Letnija Alimpijskija Hulni. Na padrychtoŭku biełaruskich alimpijcaŭ pakul ź biudžetu vydzielili 10 miljonaŭ dalaraŭ. Pra heta paviedamiŭ na presavaj kanferencyi Alaksandar Hryharaŭ, namieśnik ministra sportu dy turyzmu. Heta ŭsiaho 60% ad patrebnaj sumy. Ci znojducca jašče nieabchodnyja 6 miljonaŭ?
Viadoma, znojducca, my na našych spartoŭcaŭ ničoha nie paškadujem. Navat kali pryjdziecca šukać na samym vysokim uzroŭni. Mienavita tamu niadaŭna prezydent Nacyjanalnaha Alimpijskaha Kamitetu A.Ł. inicyjavaŭ vyklučeńnie sa składu hetaha samaha kamitetu 47 siabraŭ. U tym liku vyšejzhadanaha Hryharava dy načalnika ŭpraŭleńnia sportu taho samaha ministerstva Źmitra Šyčko. Na ich miesca ŭ NAK uviali vice-premjera Barysa Baturu, namieśnika hienprakurora Piatra Ivanienku, kiraŭnika KHB Uładzimiera Mackieviča. Heta samyja mocnyja pierastanoŭki ŭ biełaruskaj alimpijskaj kamandzie za ŭvieś čas jaje isnavańnia. Paśla hetaha taktyčnaha chodu naša kamanda maje realnyja šancy na atrymańnie 6 piatych i 3 siomych miescaŭ u Sydnei.
Na siońnia biełaruskija spartoŭcy pa vynikach adboračnych spabornictvaŭ užo dabilisia 133 puciovak na Alimpijadu. Usiaho ž, pavodle papiaredniaj acenki, u skład našaj delehacyi ŭvojduć kala 260 čałaviek, u tym liku da 170 spartoŭcaŭ. Značyć, na kožnaha spartoŭca my majem vytracić pad 95000 tys. dalaraŭ.
Zrešty, specyjalisty ličać, što vytracić možna j pa 93000 tysiačy na spartoŭca, a reštu, 340000 dalaraŭ, pakinuć u rasparadžeńni kiraŭnika Alimpijskaha kamitetu, jakomu treba asabista rychtavacca da tryjumfalnaha zaniaćcia 9-ha miesca na zimovych Alimpijskich hulniach razam z usioj našaj chakiejnaj kamandaj.
Adnak jašče daloka nia ŭsie miescy na Alimpijadu raźmierkavanyja. Što budzie, kali biełarusy zavajujuć bolš za 170 licenzijaŭ?
Pres-ataše NAK Piatro Rabuchin skazaŭ, što z-za finansavych prablemaŭ spartoŭcy, niazdolnyja zmahacca za alimpijskija medali, u Sydnej nie pajeduć. Ale ci zmoža maładoje pakaleńnie spartoŭcaŭ vyraści ŭ sapraŭdnych zorak, nie paniuchaŭšy alimpijskaha porachu? Tamu niazdolnych zmahacca, treba dumać, u nas nia budzie.
Usich nas cikavić, u jakich sportach biełarusy mohuć realna raźličvać na počaści. Niesumnienna, u spartyŭnaj dy mastackaj himnastycy. Našaha Ivana Ivankova viedajuć na ŭsim śviecie. My čakajem medaloŭ i ad našaj viaślarki Kaciaryny Karsten (Chadatovič). Pieršaja rakietka śvietu ŭ nastolnym tenisie Uładzimier Samsonaŭ taksama nacelvajecca na ŭznaharody samaj vysokaj vartaści. Biełarusy majuć šancy na pryzavyja miescy ŭ kulavoj stralbie, lohkaj atletycy, płavańni, ciažkaj atletycy, boksie, volnym dy hreka-rymskim dužańni.
A jak ža kraina adździačyć svaim alimpijskim hierojam? Pavodle sp.Rabuchina kožny biełaruski spartoviec, jaki zavajuje załaty medal, atrymaje 60 tysiačaŭ zabaronienych u.a., za srebra paabiacali 40 u.a., a ŭładalnik bronzavaha medala moža raźličvać na 22,5 tysiačy ŭ.a. Akramia taho, čempijonam Sydneju ŭłady abiacajuć biaspłatnaje žytło ŭ niadaŭna zbudavanaj u Miensku Alimpijskaj vioscy. Razhladajecca j pytańnie arhanizacyi na bazie hetaj vioski kałhasu «Alimpijski» i kompleksu pa adkormie bujnoj rahataj žyvioły. Našy spartoŭcy musiać być upeŭnienyja ŭ svajoj budučyni!
Bohuś Bijatlanionak